Саудия Арабистони ва Бирлашган Араб Амирликлари АҚШ Президенти Дональд Трамп ва Россия раҳбари Владимир Путин ўртасидаги саммит ўтказилиши мумкин бўлган жой сифатида кўрилмоқда.

Қўшма Штатлар етакчиси РФ – Украина урушини имкон қадар тезроқ тугатиш учун россиялик ҳамкасби билан учрашишга тайёрлигини айтди. Путин Трампни сайлангани билан табриклаб, Украина ва энергетика масалаларини муҳокама қилиш учун музокара столига чорлаган, деб ёзди “Reuters” ахборот агентлиги.

Трамп якшанба куни ўзининг маъмурияти “турли томонлар, жумладан Украина ва Россия билан музокара режалаштиргани”ни таъкидлади.

Саудия Арабистони валиаҳд шаҳзодаси Муҳаммад бин Салмон Трамп лавозимга киришгандан кейин чақирган биринчи хорижий давлат раҳбари бўлди. У Давосдаги Жаҳон иқтисодий форумида видео ҳавола орқали нутқ сўзлаб, валиаҳд шаҳзодани “фантастик йигит” дея таърифлади.

2023 йил Саудия ва БААга борган Путин Муҳаммад бин Салмонга АҚШ ва Россия ўртасида совуқ урушдан кейинги энг йирик маҳбус алмашинувини ташкиллаштиришда ёрдам бергани учун миннатдорлик билдирганди.

Хуллас, Трамп ҳам, Путин ҳам Саудия ва БАА ҳукмдорлари билан дўстона муносабатни ривожлантириб келган.

Муҳаммад бин Салмон 2015 йил РФга илк бор ташриф буюргандан бери Путин билан яқин. Ўзаро қалин муносабат нефть экспорт қилувчи дунёдаги икки йирик давлат раҳбарларига OPEK+ энергия бўйича келишувни тузиш ва сақлаб қолишга ёрдам берди. Трамп Саудия Арабистони ва ОPEKни нефть нархини пасайтиришга чақирган.

Муҳаммад бин Салмон ҳам, БАА Президенти Муҳаммад бин Зоид Ол Наҳаён ҳам Украина уруши давомида бетарафликни сақлаб, Москвани танқид қилиш ва РФга санкция қўйиш масаласида Ғарбга қўшилмай келди. Шунга қарамай, бу икки араб мамлакати етакчилари Украина Президенти Владимир Зеленский билан ҳам мунтазам алоқада.

Муҳаммад бин Зоид Ол Наҳаён уруш пайти Россияга бир неча келган ва 2024 йил октябрь ойида сўнгги ташрифи чоғида Украинада тинчлик ўрнатиш бўйича саъй-ҳаракатни қўллаб-қувватлашга тайёрлигини айтган. БАА маҳбусларни алмашишда ҳам муваффақиятли воситачилик қилди. Иккала давлат ҳам Путинни ҳибсга олишга ордер берган ва унинг қатор давлатлар, жумладан Бразилия ва Жанубий Африкага ташрифига тўсқинлик қилган Халқаро жиноий суд аъзоси эмас.

Мусулмон Зиё, ЎзА