– Ғарб санкцияси туфайли Германиянинг “Siemens” компанияси томонидан муҳим энергетика ускуналари етказиб берилиши жараёнида сезиларли кечикиш кузатилмоқда, – дейди Россиянинг Туркиядаги Фавқулодда ва мухтор элчиси Алексей Ерхов “РИА Новости” агентлигига берган интервьюсида. – Бу ҳолат “Аккую” атом электр станцияси қурилиши суръатига таъсир кўрсатяпти.

2024 йил октябрь ойида Россия Бош вазири ўринбосари Александр Новак “Siemens” ушбу АЭСнинг 1-энергоблогини жиҳоз билан таъминлаш бўйича мажбуриятини бажармагани, шу масалада компания билан олиб борилган музокаралар натижа бермагандан кейин, зарур эҳтиёт қисмлар муқобил чора сифатида бошқа дўст мамлакатлардан сотиб олингани ҳақида хабар берган.

1 ноябрда Туркия энергетика вазири Алпарслон Байроқдор Германия Канцлери Олаф Шольцнинг Истанбулга ташрифи чоғида Президент Режеп Таййип Эрдоғанга “Siemens” компанияси “Аккую” мажмуаси учун кечиктирилган маҳсулотлар етказиб берилишини ваъда қилгани, аммо бу ускуналар энди керак эмаслигини таъкидлади.

Туркияда шу вақтгача АЭС йўқ эди. Мазкур объект ушбу қардош давлат Россия билан ҳамкорликда амалга ошираётган энг йирик лойиҳа ҳисобланади. 1200 МВт қувватга эга, илғор ВВЕР-1200 реакторлари билан ишлайдиган тўртта энергоблокнинг барчаси ишга туширилгач, ҳар бир станция йилига 35 миллиард кВт/соат қувват ишлаб чиқара бошлайди. Шу тариқа мамлакатдаги электр энергиясига эҳтиёжнинг 10 фоизигача қопланиши кўзда тутилган.

– Айни дам иншоотнинг 1-энергоблогини тўлиқ ҳажмда ишга тушириш бўйича иш қизғин, – деганди “Росатом” Бош директори Алексей Лихачёв аввалроқ. – Биринчи блок турбинасини ўрнатиш ўтган йил охирида муваффақиятли якунланган.

С.Раҳимов, ЎзА