![](https://cdn.uza.uz/2025/01/29/17/42/WYAktHWEMAOOzDnKR9LIkoEmp6d32JLX_front.jpg)
Қозоғистон Энергетика, Молия ва Ички ишлар вазирликларининг Миллий хавфсизлик қўмитаси билан қўшма буйруғи асосида ички бозорда юзага келган танқисликнинг олдини олиш мақсадида темир йўл орқали бензин ва дизель ёнилғисини бошқа давлатлар, жумладан Евросиё иқтисодий иттифоқи мамлакатларига экспорт қилишни тақиқлади.
Шу муносабат билан эълон қилинган ҳужжатда таъкидланганидек, тақиқ 29 январдан жорий қилинади ва 29 мартгача амал қилади. Даровқе, қонунга мувофиқ, олдиндан режалаштирилган етказиб бериш, шунингдек гуманитар ёрдам ёки фавқулодда вазиятни бартараф этиш учун мўлжалланган ёнилғига нисбатан истисно ҳолати қўлланиши тартиби сақланиб қолган.
2024 йил сентябрь ойи охирида автотранспорт воситалари бакидаги миқдордан ташқари бензин ва дизель ёнилғисини республикадан олиб чиқиш олти ой муддатга ман этилган эди. Бу қарор март ойи охиригача амал қилади.
Ҳукумат 2025 йил ёнилғи қуйиш шохобчаларида аввал тартибга солинган нархни эркинлаштира бошлади. Энергетика вазирлиги буйруғи лойиҳаси ва ушбу ҳужжат иловасида қўшни давлатларда бензин ва дизель ёнилғиси нисбатан қимматлиги сабабли, маҳсулот мамлакатдан ноқонуний чиқиб кетишининг олдини олиш мақсадида, тегишли қарор кучга кириши кўрсатилди. Бундан ташқари нархни назорат қилиш ёнилғи ишлаб чиқарувчиларга ишлаб чиқариш қувватини модернизация қилиш учун етарли даромад олиш имконини бермайди.
28 январь куни айни масалада бўлиб ўтган матбуот анжуманида энергетика вазири Алмасадам Саткалиев нархни тартибга солиш бекор қилиниши муносабати билан февраль ойида ёнилғи қуйиш шохобчаларида чакана нарх ошиши мумкинлигини маълум қилди. У ҳукумат нарх кескин ошишига йўл қўймаслигини таъкидлаб, қиймат ҳеч бўлмаганда Россия билан тенглашиши кутилаётганини айтди.
С.Раҳимов, ЎзА