АҚШ Президенти Дональд Трамп “Майкрософт” компанияси “ТикТок”ни сотиб олиш бўйича музокара олиб бораётганини назарда тутиб, “тендер уруши”ни кузатишга иштиёқи баландлигини билдирди. Бу ҳақда BBC ёзган.

Трамп ҳам, Жо Байден ҳам бир неча йилдан бери “ТикТок”нинг Хитойдаги бош компанияси “ByteDance”ни миллий хавфсизлик нуқтаи назаридан АҚШдаги улушини сотишга ундаб келяпти.

Маълумки, собиқ етакчи Байден маъмурияти Қўшма Штатларда 170 миллион фойдаланувчиси бор мазкур иловани қисқа муддатли офлайн режимга ўтказиб, “ТикТок”ка муайян тақиқ жорий қилган эди. Ўтган ҳафта янги Президент ушбу қарорни кечиктириш тўғрисидаги фармонни имзолади.

Хуллас, Трамп “ByteDance”га иловасини сотиш учун босим ўтказа бошлаган биринчи мамлакат раҳбаридир.

2020 йил август ойида “ByteDance” Майкрософтга эҳтимолий харидор сифатида мурожаат қилган. Кейинчалик, “ТикТок” потенциал шерикликка рақиб “Oracle”ни танлади. Бинобарин, ҳозиргача ҳеч бир келишув амалга ошмаган.

Америка етакчиси ушбу платформани сотиб олиш бўйича бир неча ҳамкор билан музокара олиб борилаётгани, келгуси 30 кун ичида илованинг келажаги бўйича қарор қабул қилиниши кутилаётганини айтган. Харидорлар орасида миллиардер Френк Маккорт ва канадалик бизнесмен Кевин О`Лири бор. Шунингдек, тармоққа дунёдаги энг йирик “Youtuber” Жимми Дональдсон – “АКА MrBeast” ҳам катта қизиқиш билдирмоқда.

Мусулмон Зиё, ЎзА