Юртимизда спорт турлари бўйича кучлиларни тенг рақобатда аниқлаш, энг маҳоратлиларни миллий терма жамоаларга жалб этиш ҳеч қачон осон кечмаган.

Айниқса, бокс бўйича Ўзбекистон миллий терма жамоасини шакллантириш мураббийлардан, мутахассислардан катта заҳматни талаб этади. Бунда ўтказилаётган ички мусобақалар, саралаш турнирлари ва ниҳоят, мамлакат чемпионати юқори нуқта саналади.

Ўтган йили бокс бўйича халқаро мусобақаларнинг кўплиги айниқса, «Париж-2024» Олимпия ўйинлари, Осиё ва жаҳон чемпионатларининг кетма-кет келиши натижасида 2024 йилги Ўзбекистон чемпионати жорий йилнинг январь ойида ташкил этилмоқда.

Айтиш лозим, жорий йилнинг 21 январидан пойтахтимиздаги Республика Олимпия ва Паралимпия спорт турларига тайёрлаш марказининг бокс залида бошланган Ўзбекистон чемпионатининг ортда қолган саралаш жангларининг ҳар бири иштирокчи спортчилар учун финал даражасида ўтди.

Кеча пойтахтимиздаги “Zoʻr TV” телеканалининг “Renessans Hall” мажмуасида ўтган чемпионатнинг ярим финал баҳслари қайсидир маънода “кичик жаҳон чемпионати” кўринишини олди, десак муболаға бўлмайди.

Бугун, 28 январь куни чемпионатнинг финал жанглари ўтказилади. Боксчи қизлар ва йигитлар ўртасида 12 тадан вазн тоифасида Ўзбекистон чемпионлари аниқланади.

Боксчи қизлар рўйхатига эътибор қаратсак, финал жангларида Фарзона Фозилов – Робия Бахтиёрова 48 килограммда, Сабина Бобоқулова – Гулсевар Ғаниева 50 килограммда, Феруза Казакова – Зилола Юсупова, 52 килограммда, Азиза Ёқубова – Мухлиса Хушвақтова 54 килограммда, Нигина Ўктамова – Хуморабону Мамажонова 57 килода, Ситора Турдибекова – Рашида Тагирова 60 килода, Дилфуза Бекова – Одинахон Исмоилова 63 килода, Навбаҳор Ҳамидова – Айсанем Сарварова 66 килода, Ойша Тоирова – Мавлуда Мавлонова 70 килода, Азиза Зокирова – Азиза Усмонова 75 килода, Соҳиба Рўзметова – Машҳура Солибоева 81 килода, Олтиной Сотимбоева – Диёрахон Абдуманнобова +81 килограммда рўбарў келади.

Боксчи йигитлар ўртасида кеча ўтказилган ярим финал жангларида ғолибликни тантана қилган маҳоратли чарм қўлқоп усталари тўқнаш келади:

-48 кг: Шодиёржон Мелиқўзиев – Беҳруз Холдоров,

-51 кг: Асилбек Жалилов – Муҳаммадқодир Мамиржонов,.

-54 кг: Шахзод Музаффаров  – Фарёзбек Дўсматов,

-57 кг: Миразизбек Мирзахалилов – Хўжаназар Нортожиев,

-60 кг: Мадиёр Дониёров – Шоҳрух Абдумаликов,

-63,5 кг: Руслан Абдуллаев – Адҳамжон Муҳиддинов,

-67 кг: Мужибилло Турсунов – Шавкатжон Болтаев,

-71 кг: Ҳавасбек Асадуллаев – Иқболжон Холдоров,

-75 кг: Жавоҳир Умматалиев – Аълохон Абдуллаев,

-80 кг: Фазлиддин Эркинбоев – Нурислом Исмоилов,

-86 кг: Нусратбек Тоҳиров – Акмалжон Исроилов,

-92 кг: Тўрабек Ҳабибуллаев – Мадиёр Саидраҳимов,

+92 кг: Жаҳонгир Зокиров – Арман Маханов.

Кўриниб турганидек, финал жангининг ҳар бир учрашуви қизғин кечиши тайин.

«Париж-2024» Олимпиадаси қаҳрамони Ситора Турдибекова, 2017 йилги жаҳон чемпионати совриндори Иқболжон Холдоров, номдор чарм қўлқоп вакиллари Миразизбек Мирзахалилов, Руслан Абдуллаев, Мужибилло Турсунов, Мадиёр Саидраҳимов, Тўрабек Ҳабибуллаевлар қаторида умидли ёшларнинг чемпионликка даъвогарлик қилаётгани ўзбек боксида юксалиш онлари бошланаётганини англатаётгандек, гўё.

Айнан бугун рингда ўз қудратини, маҳоратини, шиддатини намойиш этадиган боксчиларимиз келгуси жаҳон чемпионатларида, Олимпия ўйинларида янгиланаётган Ўзбекистон спортининг янги ғалабаларини таъминласа, ажабмас.

Т.Рўзиев, ЎзА