Жанубий Корея прокуратураси Президент Юн Сок Ёлга қарши расман айблов эълон қилди. Бу ҳақда “Yonhap” агентлиги хабар берди. Мамлакат етакчиси давлат тузумига қарши исён кўтарганликда шубҳаланмоқда. Тахминга кўра, у қонунчилар ҳарбий ҳолат эълон қилинишига қарши овоз беришига йўл қўймаслик учун парламентга қўшин юборган бўлиши мумкин.

Юн Сок Ёль Корея Республикасининг ҳибсга олинган биринчи президентидир. Бу воқеа Миллий ассамблея 2024 йил 14 декабрда Президентнинг истеъфосини талаб қилгандан кейин содир бўлди. Парламент унинг буйруғини конституцияга зид қарор сифатида баҳолади.

Юн Сок Ёль ҳарбий ҳолат жорий этилиши мухолифатдаги Демократик партия томонидан йўл қўйилаётган суистеъмол ҳолатларидан огоҳлантиришга қаратилган “маъмурий қадам”лигини айтиб, ўзини оқламоқда.

– Бу ноқонуний тергов бўлса-да, қон тўкилишига олиб келадиган шармандаликнинг олдини олиш учун Марказий разведка бошқармаси ҳузурига келдим, – деган у ушлангандан кейин.

Президент ўз қароргоҳида терговчилар ва собиқ давлат раҳбари жамоаси ўртасида узоқ давом этган музокарадан сўнг қўлга олинган.

2024 йил 31 декабрь куни Жанубий Корея Ғарбий округ суди “исён” ва “ҳокимиятни суистеъмол қилиш”да айблаб, Юн Сок Ёлни ҳибсга олиш бўйича қарор чиқарди. 2025 йил 3 январда режани амалга оширишга уриниш чоғи полиция ва Президент хавфсизлик хизмати ходимлари ўртасида тўқнашув юзага келган ва буйруқ ижроси кечиктирилган.

Маълумки, Юн Сок Ёль 3 декабрь куни мухолифатнинг “давлатга қарши фаолият”га алоқадорлигини рўкач қилиб, ҳарбий ҳолат жорий этди. Сўнгра Мудофаа вазирлиги қўмондонларга йиғилиш ўтказиш бўйича кўрсатма бериб, ҳарбийларни шай ҳолатга келтиришга чақирди. Вазифа юклатилган аскарлар Миллий ассамблея (Парламент) биносига киришди.

Фавқулодда йиғилишда ҳарбий ҳолатни бекор қилиш таклифини 190 депутат қўллаб-қувватлади. Расмийлар айтишича, овоз бериш натижасига кўра, ҳарбий ҳолат “ўз кучини йўқотган”. Шундан кейин Президент фикрини ўзгартирди, Вазирлар Маҳкамаси йиғилишини чақирди ва ҳукуматнинг розилигини олгач, ҳарбий ҳолатни расман бекор қилди.

Кейинроқ “давлатга хиёнат” иши бўйича тергов олиб борилаётгани учун Президентга мамлакатдан чиқиш тақиқланди. Юн Сок Ёль Конституциявий суд томонидан масала кўриб чиқилгунга қадар лавозимидан четлатилди. 27 декабрь куни президент вазифасини бажарувчи Хан Дук Су ҳам ваколатидан айрилди. Айни қарор Миллий ассамблеяда овоз бериш натижаси асосида чиқарилди. Ҳозирча президентлик ваколати Бош вазир ўринбосари, режалаштириш ва молия вазири Чхве Сан Мокка берилган.

Г.Сатторова,
ЎзА