Туркиянинг Болу вилоятидаги  тоғ-чанғи курорти “Карталкая” дам олиш масканида юз берган ёнғин оқибатида ҳалок бўлганлар сони 76 кишига етди, деб маълум қилди мамлакат ички ишлар вазири Али Ерликая.

Вазирнинг таъкидлашича, фавқулодда ҳолат юзасидан олиб борилган тергов доирасида тўққиз киши, жумладан меҳмонхона хўжайини ҳам ҳибсга олинган.

Меҳмонларнинг кўпчилиги деразалардан чойшабларга осилиб  пастга тушишга ҳаракат қилишган, баъзилари ерга сакраган.

“Ekol TV” хабарига кўра, 1974 йилда қурилган меҳмонхона деворлари ёғоч билан қоплангани ёнғиннинг тез тарқалишига сабаб бўлган. Қутқарилганлардан бирининг айтишича, бинода тутунни аниқловчи ва ўт ўчириш мосламалари умуман бўлмаган.

Аввалроқ, 18 январь куни Истанбул шаҳрининг Аташеҳир туманидаги меҳмонхонанинг ошхонасида ҳам ёнғин содир бўлганди. Ёнғин оқибатида беш нафар меҳмон касалхонага ётқизилган. Кейинчалик маълум бўлишича, улардан уч нафари вафот этган.

С.Раҳимов, ЎзА