Жанубий Кореяда ҳарбий ҳолат эълон қилиниши юзасидан олиб борилаётган тергов доирасида давлат раҳбари лавозимидан четлаштирилган ва ҳибсга олинган Юн Сок Ёль иши бўйича суд мажлиси бошланди.

“Yonhap” ахборот агентлиги хабарига кўра, Юн Сок Ёль Сеулдаги ҳибсхонадан импичмент бўйича суд мажлислари ўтказиладиган Конституциявий судга олиб кетилган.

Юн Сок Ёл маҳаллий вақт билан соат 14:00 да бўлиб ўтган импичмент бўйича суд мажлисида иштирок этиб, айбловлар бўйича ўз ҳимоясини тақдим этган. Ўша вақтда президентнинг юзлаб тарафдорлари уни қўллаб-қувватлаш учун суд биноси олдида тўпланишган.

Конституциявий суд 2024 йил 14 декабрда бошланган кундан эътиборан олти ой ичида президентни лавозимидан озод этиш тўғрисида қарор қабул қилиши керак. Aгар суд Юн Сок Ёлни лавозимидан четлаштиришга қарор қилса, Жанубий Кореяда 60 кун ичида муддатидан олдин президентлик сайловлари ўтказилади.

Хабарда айтилишича, импичментга дуч келаётган амалдаги президент Конституциявий суд залида биринчи марта шахсан иштирок этган.

Эслатиб ўтамиз, 15 январь куни ҳибсга олинган Жанубий Корея президенти Юн Сок Ёль Сеул Ғарбий округ суди томонидан “қўзғолонга бошчилик қилиш” ва “ҳокимият ваколатини суиистеъмол қилиш”да айбланиб, ҳибсга олинган.

Г.Сатторова, ЎзА