Сўнги йилларда Саудия Арабистони билан мамлакатимиз ўртасида  инвестициявий ҳамкорлик кўлами кенгайиб бормоқда. Ўзбекистон инвестициялар, саноат ва савдо вазири Лазиз Қудратов Саудия Aрабистонининг “Al Arkan” компанияси ижрочи директори Муҳаммад ал-Фассом билан учрашуви ушбу ҳамкорликнинг яна бир давоми, десак бўлади.

Суҳбат давомида озиқ-овқат маҳсулотларини ишлаб чиқариш жараёнлари ва хизматлар кўрсатишда хавфсизлик ва гигиена бўйича комплекс дастур ишлаб чиқиш ва амалга ошириш юзасидан амалий чоралар муҳокама қилинди.

Дастур озиқ-овқат маҳсулотлари сифатини назорат қилиш миллий тизимини ривожлантириш, озиқ-овқат саноати ходимларини замонавий хавфсизлик стандартларига ўргатиш, тиббиёт, туризм ва транспорт хизматлари даражасини юксалтириш бўйича ўқув дастурларини жорий қилиш, инфратузилмани модернизациялаш, касб-ҳунар таълими тизимини такомиллаштиришни ва бошқа бир қатор йўналишларни қамраб олади.

Лойиҳани амалга ошириш мамлакатимизнинг етакчи компанияларига хизмат кўрсатиш, юқори сифатли озиқ-овқат маҳсулотлари ишлаб чиқаришни сифат жиҳатидан янги босқичга кўтариш имконини беради.

Учрашув якунида томонлар биргаликдаги саъй-ҳаракатларни фаоллаштиришга тайёрлигини билдириб, лойиҳани амалга оширишни жадаллаштириш бўйича аниқ чораларни белгилаб олдилар.

Г.Сатторова, ЎзА