So‘ngi yillarda Saudiya Arabistoni bilan mamlakatimiz o‘rtasida  investitsiyaviy hamkorlik ko‘lami kengayib bormoqda. O‘zbekiston investitsiyalar, sanoat va savdo vaziri Laziz Qudratov Saudiya Arabistonining “Al Arkan” kompaniyasi ijrochi direktori Muhammad al-Fassom bilan uchrashuvi ushbu hamkorlikning yana bir davomi, desak bo‘ladi.

Suhbat davomida oziq-ovqat mahsulotlarini ishlab chiqarish jarayonlari va xizmatlar ko‘rsatishda xavfsizlik va gigiyena bo‘yicha kompleks dastur ishlab chiqish va amalga oshirish yuzasidan amaliy choralar muhokama qilindi.

Dastur oziq-ovqat mahsulotlari sifatini nazorat qilish milliy tizimini rivojlantirish, oziq-ovqat sanoati xodimlarini zamonaviy xavfsizlik standartlariga o‘rgatish, tibbiyot, turizm va transport xizmatlari darajasini yuksaltirish bo‘yicha o‘quv dasturlarini joriy qilish, infratuzilmani modernizatsiyalash, kasb-hunar ta’limi tizimini takomillashtirishni va boshqa bir qator yo‘nalishlarni qamrab oladi.

Loyihani amalga oshirish mamlakatimizning yetakchi kompaniyalariga xizmat ko‘rsatish, yuqori sifatli oziq-ovqat mahsulotlari ishlab chiqarishni sifat jihatidan yangi bosqichga ko‘tarish imkonini beradi.

Uchrashuv yakunida tomonlar birgalikdagi sa’y-harakatlarni faollashtirishga tayyorligini bildirib, loyihani amalga oshirishni jadallashtirish bo‘yicha aniq choralarni belgilab oldilar.

G.Sattorova, O‘zA