Бугун Олий Мажлис Қонунчилик палатасидаги сиёсий партиялар фракцияларининг йиғилишлари бўлиб ўтди. Уларда бир қатор қонун лойиҳалари қизғин муҳокама қилинди.

Жумладан, Ўзбекистон Экологик партияси фракциясининг йиғилишида “Ўзбекистон Республикасининг Ер кодексига ўзгартириш ва қўшимчалар киритиш тўғрисида”ги қонун лойиҳаси биринчи ўқишда кўриб чиқилди.

— Мазкур қонун лойиҳаси билан суғориладиган ер участкаларини бошқа тоифага ўтказиш бўйича талабларни қонун даражасида янада кучайтириш таклиф этилмоқда, — деди фракция аъзоси Моҳира Хўжаева. — Шунингдек, қишлоқ хўжалигига мўлжалланган ер участкаларини фойдаланиш турига қараб 2 гуруҳга, яъни қишлоқ хўжалиги ер участкалари ва қишлоқ хўжалигига хизмат кўрсатувчи ерларга бўлиш бўйича аниқ нормалар киритилмоқда.

Бундан ташқари, суғориладиган ерларни қатъий муҳофаза қилиш, бундай ерлардан бошқа мақсадларда фойдаланиш масаласини фақатгина суғориладиган ерларнинг сув таъминоти ва тупроқ сифати билан боғлиқ жиддий ўзгаришлар юз берган тақдирда кўриб чиқилиши юзасидан ҳуқуқий нормалар белгиланмоқда. Қонун лойиҳасининг қабул қилиниши мамлакатимизда қишлоқ хўжалигига мўлжалланган ер участкаларида қишлоқ хўжалигига хизмат кўрсатувчи объектларни жойлаштириш, ерга бўлган ҳуқуқларни ишончли ҳимоя қилишга хизмат қилади.

Йиғилишда қонун лойиҳаси қизғин муҳокама қилиниб, фракция аъзолари томонидан таклиф ва тавсиялар берилди ҳамда қонун лойиҳаси қўллаб-қувватланди.

Шунингдек, Халқ демократик партияси фракциясининг йиғилишида  қонун лойиҳаларини Қонунчилик палатасининг муҳокамасига киритиш ва кўриб чиқиш тартибини такомиллаштиришга қаратилган қонун лойиҳаси иккинчи ўқишда кўриб чиқилди.

Унга кўра, қонун лойиҳаларини қуйи палатага киритишда қонун лойиҳасининг ҳуқуқий экспертизаси натижалари, коррупцияга қарши экспертизаси ва у бўйича ўтказилган жамоатчилик муҳокамаси натижаларини тақдим этиш талаби белгиланмоқда.

Шунингдек, қонунчилик ташаббуси ҳуқуқи субъектига ўзи киритган қонун лойиҳаси иккинчи ўқишда қабул қилингунига қадар Қонунчилик палатасига таклиф киритиш орқали уни чақириб олиш ҳуқуқини бериш масаласи ўз аксини топмоқда.

Фракция йиғилишида кун тартибига киритилган шу ва бошқа қонун лойиҳалари депутатлар томонидан қизғин муҳокама этилиб, тегишли қарорлар қабул қилинди.

Муҳтарама Комилова,

Дониёр Ёқубов, Улуғбек Тўхтаев (видео), ЎзА