АҚШнинг сайланган президенти Дональд Трампнинг давлат раҳбарлигига киришиши муносабати билан тантанали маросим бўлиб ўтади.  Ушбу тадбир олдидан журналистлар унинг Украинадаги можаро бўйича қилган баёнотларида сезиларли даражада ўзгаришлар юз берганига эътибор қаратмоқда.

– Оқ уйнинг бўлажак етакчиси сайлов кампанияси пайти Украинадаги низони 24 соат ичида ҳал қилиш ҳақидаги баландпарвоз ваъдаларни берганди. Кейинчалик, у сайловда ғалаба қозонганидан кейин бу масала бўйича анчайин эҳтиёткорона баёнотлар бера бошлади, –деб ёзмоқда “РИА Новости” инаугурация арафасида.

“Амбиция даври”дан ҳақиқат билан юзма-юз келгунга қадар

Маълумки, Трамп ўзининг сайлов кампанияси даврида Украинадаги можарони энг қисқа вақт ичида ҳал қилиш қобилиятини таъкидлаб келди.

– Мен 24 соат ичида келишувга эришган бўлардим, -деганди у 2024 йил июль ойида “Fox News” телеканалига берган интервьюсида.

Қизиқ жиҳати, келишув жараёнини инаугурациядан олдин бошлаши мумкинлигини айтган Трамп сайловдан кейин баёнот беришда янада эҳтиёткор бўлиб қолганини кўриш мумкин.

Ваъдалар, ҳохишлар бошқа нарса-ю, уларни ҳаётга жорий қилиш бутунлай бошқа нарса эканини кейинги жараёнлар яна бир бор эслатмоқда. Муаммога янада жиддийроқ ёндошиш, яъни прагматизм ва мулоқотларга урғу бериш зарурлигини англаб етган Трамп сайловдан кейин музокаралар ва дипломатия зарурлигини тобора кўпроқ таъкидлай бошлади.

– Мен бу масалани музокаралар йўли билан ҳал қилмоқчиман, -деди у ўтган йил декабрида Пенсильванияда бўлиб ўтган учрашувда.

Жорий йил январь ойида Трамп Москва билан мулоқотга тайёрлигини тасдиқлади.

– РФ раҳбари мен билан учрашмоқчи, биз буни ташкил қиляпмиз, -деди Трамп журналистларга.

Яна бир жиҳат шундаки, Трамп ҳар доим урушни тўхтата олишини таъкидлаб келади, лекин бу муаммони қайси йўл билан уддалаши ҳақида лом-мим демайди.

– Музокарачи сифатида мен жуда яхши режадан бошлайман, аммо тафсилотларни ошкор қила бошласам, бу режа деярли барча қийматини йўқотади, -деди у “Time” журналига берган интервьюсида.

Кремлнинг Трамп баёнотларига муносабати

Россия раҳбарияти табиийки Трамп ва унинг жамоаси бераётган баёнотларни диққат билан кузатиб келмоқда, лекин узил-кесил баҳо беришга шошилмаяпти. Масалан, Россия президенти матбуот котиби Дмитрий Песков АҚШ сиёсатидаги эҳтимолий ўзгаришлар ҳақида хулоса чиқаришга ҳали эрта эканини таъкидлайди.

– Бу ҳақда расмий тайинловлар амалга оширилганидан кейингина гапириш мумкин бўлади, -деди у журналистларга.

Хулоса қилиб айтганда, Трампнинг кейинги бераётган баёнотлари бир қадар ўзгаришларни бошдан кечирди. Вазият эса масалага  сайловолди кампаниясидаги амбицияли ваъдалардан реалроқ ёндашувга ўтишни тақоза  этмоқда. Зеро, томонларнинг музокараларга тайёрлиги ҳақидаги баёнотларига қарамай, можарони ҳал қилиш АҚШ етакчиси ўйлаганидан кўра анчайин мураккаб эканини ҳаётнинг ўзи кўрсатмоқда.

Шунга қарамай, Дональд Трамп Россия – Украина низосига барҳам бериш режасидан воз кечмаслигини ҳар чиқишида эслатиб турибди.

– Украинадаги зиддиятни, Яқин Шарқдаги тартибсизликни тўхтатаман ва шу билан учинчи жаҳон урушининг олдини олган бўламан, -деди у.

С.Раҳимов, ЎзА