Жанубий Корея Президенти Юн Сок Ёлнинг тарафдорлари уни қамоққа олиш масаласи ҳал этилаётган суд залида жанжал уюштиришди. Мамлакатнинг етакчи ахборот агентлиги – Рёнхап ёзишича, жазавага тушган қўзғолончилар полиция тўсиғини ёриб ўтишга муваффақ бўлган ва суд ўтаётган бино ҳудудига орқа томондаги дарвозадан кириб борган.

Президент ҳимоячиларининг бир қисми темир панжаралардан ошиб, намойишчиларга қўшилган. Оломон ҳовлини ишғол қилгач, асосий бино деразалари ойналарини чил-чил қилиб, ичкарига ўтиб олган. Вазият назоратдан чиққач, босқинчилар қўлларига илинган ўт ўчириш мосламалари ва бошқа ҳар қандай буюм, жиҳозлар билан мебелларни синдира бошлаган, «Президент Юн Сок Ёль», дея қичқиришган. Бир гуруҳ одамлар давлат раҳбарини турмага ташлаш ҳақида ҳукм чиқарган судьяни қидириб қолишди. Айримлар полиция ходимларига ташланиб, уларга елим ўриндиқлар ирғитишди, тартиб посбонларининг қалқонлари, резина дарраларини олиб қўйиб, ўзларига қарши ишлатишга уринишди.

Дарвоқе, Юн Сок Ёль тарафида бўлган баъзилар сафдошларини тинчлантиришга уринган ва «Президент буни хоҳламагани»ни таъкидлаган. Воқеа жойига қўшимча кучлар етиб келгач, ҳуқуқ муҳофазачилари ўта фаол қўзғолончиларни қўлга олди, қолган намойишчилардан зудлик билан бинони тарк этишни сўради. Суд залига бостириб кириб келганларнинг барчаси тарқалиш, келишилмаган митингни тўхтатиш, умуман ноқонуний ҳаракатлардан чекинишга чақирилди. ЎзА ишончли манбалар орқали Корея Республикасидаги фавқулодда ҳолатни кузатиб боради.

ЎзА