Ўзбекистон Республикаси Президентининг 2019 йил 4 декабрдаги “Ўзбекистонда футболни ривожлантиришни мутлақо янги босқичга олиб чиқиш чора-тадбирлари тўғрисида”ги Фармонида футзал, мини футбол ва соҳил футболи спорт турларини оммавийлаштириш ва ривожлантириш юзасидан вазифалар белгиланган.
Мазкур вазифалар ижросини таъминлаш мақсадида жорий йилнинг 17 декабрь куни Ўзбекистон футзал федерациясини ташкил этиш мақсадида унинг таъсис йиғилиши ўтказилди. Йиғилишда ЎФА ва ЎзПФЛ раҳбарияти ҳамда вакиллари иштирок этиб, Ўзбекистон футзал федерациясининг Устави лойиҳаси, Ижроия қўмита аъзолари, Назорат тафтиш комиссияси аъзолари тасдиқланди. Шундан сўнг, ташкилотнинг таъсис ҳужжатлари белгиланган тартибда Ўзбекистон Республикаси Адлия вазирлигидан рўйхатдан ўтказиш учун тақдим этилди.
Кеча Ўзбекистон Республикаси Спорт вазирлиги, Ўзбекистон Миллий олимпия қўмитаси, Ўзбекистон футбол ассоциацияси ва унинг ҳудудий бўлинмалари, Ўзбекистон Профессионал футбол лигаси, профессионал футбол клублари вакиллари ҳамда футзал жамоалари бош мураббийлари, шунингдек, оммавий ахборот воситалари ходимлари иштирокида ўтказилган тақдимотда янги ташкил этилаётган Ўзбекистон футзал федерацияси раҳбар органлари таништирилди.
Демак, 2025 йилдан эътиборан фаолиятини бошлайдиган Ўзбекистон футзал федерацияси президенти этиб, таъсис йиғилиши қарори билан республикамизда футбол ва футзал спорт турларининг ривожланишига ўзининг муносиб ҳиссасини қўшиб келаётган, аҳоли, айниқса, ёшлар ўртасида соғлом турмуш тарзини кенг тарғиб қилишда фаоллик кўрсатаётган, юртимизнинг фаол тадбиркорларидан бири, ВМВ holding Кузатув Кенгаши раиси, ВМВ футзал клуби президенти Бекзод Маматқулов номзоди бир овоздан маъқулланди. Шунингдек, Ўзбекистон футзал федерацияси вице-президенти этиб, “Ўзсаноатқурилишбанк АТБ” бошқаруви раиси Азиз Акбаржонов тасдиқланди. Футзал федерацияси бош котиби лавозимида эса ВМВ ПФК вице-президенти — ижрочи директор лавозимида ишлаган Маъруфжон Абдуллаев фаолият олиб боради.
Тақдимот маросими сўнггида, Ўзбекистон футзал федерацияси президенти Бекзод Маматқулов оммавий ахборот воситалари ходимлари билан матбуот анжуманини ўтказди.
Муҳаммад АМИН(сурат),ЎзА