Халқаро спорт тадқиқотлари маркази (CIES Football Observatory) жаҳон футболининг энг истиқболли футболчилари рейтингини эълон қилди.
CIES экспертлари 21 ёшгача бўлган футболчиларнинг «Wyscout» маълумотлари асосида жаҳон футболининг энг истиқболли ўн нафар марказий ҳимоячиси рейтингини шакллантирди. Аҳамиятлиси, Ўзбекистон миллий терма жамоаси ва “Ланс” клуби марказий ҳимоячиси Абдуқодир Ҳусанов ушбу рейтингда 100 дан 81,8 балл тўплаб, энг юқори поғонадан жой олди.
Кучли учликдан Италиянинг “Фиорентина” клуби шарафини ҳимоя қилаётган италиялик ҳимоячи Пьетро Комуццо ҳамда Бельгиянинг “Генк” клуби вакили Матте Сметс ҳам жой олди.
Шуни таъкидлаб ўтишимиз лозимки, жорий мавсум Абдуқодир Ҳусанов “Ланс” сафида Франция чемпионати ва кубоги, Европа лигаси каби нуфузли мусобақаларда юқори савияда ўйин намойиш этиб келмоқда.
Абдуқодир Ҳусанов жорий мавсумда барча турнирларда 16 та учрашувда иштирок этди. Шунингдек, ёш футболчимиз Ўзбекистон миллий терма жамоаси сафидаги ўйинлари сонини 18 тага етказиб олди.
Жавоҳир Тошхўжаев,
ЎзА