Бугун, 18 декабрь куни Қозоғистон пойтахти Остона шаҳрида гандбол бўйича эркаклар жамоалари ўртасида ўтаётган Марказий Осиё чемпионатининг тўртинчи кунги баҳсларида Ўзбекистон терма жамоаси Туркманистон жамоаси билан куч синашади.

Кун мобайнида шунингдек, Қозоғистон – Тожикистон, Мўғулистон – Покистон жамоалари рўбарў келади. Қирғизистон терма жамоаси учун бугун дам олиш куни сифатида белгиланган.

Ортда қолган 3 та тур ўйинларидан кейин Ўзбекистон терма жамоаси 6 очко билан турнир жадвалини бошқараётган бўлса, кейинги поғоналардан жой олган Қозоғистон 4, Покистон 4, Мўғулистон 2, Туркманистон 2 очкога эга бўлиб турибди. Мусобақада қатнашаётган Тожикистон ва Қирғизистон терма жамоалари ҳали бирон бир очко қўлга кирита олмади.

Чемпионатнинг сўнгги тур ўйинлари 21 декабрда бўлиб ўтади.

Т.Рўзиев, ЎзА