Bugun, 18 dekabr kuni Qozog‘iston poytaxti Ostona shahrida gandbol bo‘yicha erkaklar jamoalari o‘rtasida o‘tayotgan Markaziy Osiyo chempionatining to‘rtinchi kungi bahslarida O‘zbekiston terma jamoasi Turkmaniston jamoasi bilan kuch sinashadi.

Kun mobaynida shuningdek, Qozog‘iston – Tojikiston, Mo‘g‘uliston – Pokiston jamoalari ro‘baro‘ keladi. Qirg‘iziston terma jamoasi uchun bugun dam olish kuni sifatida belgilangan.

Ortda qolgan 3 ta tur o‘yinlaridan keyin O‘zbekiston terma jamoasi 6 ochko bilan turnir jadvalini boshqarayotgan bo‘lsa, keyingi pog‘onalardan joy olgan Qozog‘iston 4, Pokiston 4, Mo‘g‘uliston 2, Turkmaniston 2 ochkoga ega bo‘lib turibdi. Musobaqada qatnashayotgan Tojikiston va Qirg‘iziston terma jamoalari hali biron bir ochko qo‘lga kirita olmadi.

Chempionatning so‘nggi tur o‘yinlari 21 dekabrda bo‘lib o‘tadi.

T.Ro‘ziyev, O‘zA