Сўнгги икки йилликнинг энг муҳим ва нуфузли мусобақаларидан бирига айланган Ўзбекистон Республикаси Президенти соврини учун ўтказиб келинаётган «World Seriyes Pro» турнирининг бу галги баҳслари ҳар жиҳатдан қизиқарли кечди.

Халқаро турнирнинг расмий очилиш маросимида иштирок этган Халқаро Кураш ассоциацияси биринчи вице-президенти, Ўзбекистон Республикаси спорт вазири Адҳам Икромов, Ўзбекистон кураш федерацияси раиси, Ўзбекистон Республикаси Бош прокурори Ниғматилла Йўлдошев, Халқаро кураш ассоциацияси вице-президентлари, Африка кураш иттифоқи президенти Томас Дункер, Европа кураш конфедерацияси президенти Мирабе Илиадес, ИКА бош котиби Муҳаммад Реза Нассирийлар финал беллашувлари иштирокчиларига омад тилади. Турнир қамрови ва географияси ортиб бораётгани эътироф этилди.

Ўзбек миллий куй қўшиқлари, жозибали рақслар кетма кетлигидан иборат мусобақанинг бадиий қисми томошабинларга ўзига хос байрам кайфиятини тақдим этди. Шундан сўнг мусобақанинг энг ҳаяжонли лаҳзалари бошланди.

Пойтахтимиздаги «Универсал спорт саройи»да кечган финал босқич беллашувларида иштирок этиш учун сайёрамизнинг барча қитъаларидан маҳоратли курашчилар ўз имкониятларини синовдан ўтказди.

Ғолиблик эса энг кучлиларнинг кучлиларига, бир сўз билан айтганда, миллий спортимиз курашнинг ҳақиқий профессионалларига насиб этади.

Жорий йилда «World Seriyes Pro» турнири 10 та вазн тоифасида ташкил этилди. 4 та қитъада ташкил этилган қитъавий чемпионатлар, халқаро турнирларда ўз вазн тоифаларида энг кучли рейтинг балларини қўлга киритган 80 нафар курашчи финал йўлланмасини қўлга киритди.

Йилнинг энг сўнгги ва энг нуфузли турнирида иштирок этиш учун кураш ватани Ўзбекистонга келган номдор полвонлар сафида жаҳон ва қитъа чемпионлари, қитъавий ўйинлар ғолиблари ва халқаро турнирлар совриндорлари борлиги баҳсларнинг шиддатли кечишини таъминлади.

Кураш мухлислари билан тўлган Тошкент шаҳридаги муҳташам «Универсал спорт мажмуаси»даги баҳсларда кутилмаган натижалар қайд этилди. Энг тажрибали курашчилар орасидан биринчи босқичданоқ мусобақа билан хайрлашганлар ҳам бўлди.

Айтиш лозим, «World Seriyes Pro» халқаро турнири нафақат курашчилар ўртасидаги беллашувлар, балки дўстлик, мардлик ва жасорат байрами кўринишини олди.

Ярим финал ва финал босқичига йўлланмани қўлга киритган курашчилар иштирокидаги баҳслар кураш мухлисларини ҳаяжонга солди.

-66 кг. вазн тоифасида амалдаги Осиё чемпиони, дунё кўчманчилар ўйинлари ғолиби Отабек Ҳасанов финалда эронлик Мажид Ваҳид Бариманлоу билан дуч келди.

Қайд этиш лозимки, икки курашчи жорий йил Эроннинг Теҳрон шаҳрида ўтган катталар ўртасидаги Осиё чемпионати финалида ҳам куч синашган эди. Теҳронда бўлгани сингари Тошкентда ҳам Отабек Ҳасанов рақибини мағлуб этиб, ғолибликка эришди.

Яна бир қизиқарли финал баҳси -73 кг. вазн тоифасида икки жаҳон чемпионлари иштирокида бўлиб ўтди. Қозоғистонлик амалдаги жаҳон чемпиони Мауленин Абилкаийр 2022 йил Пунада жаҳон чемпиони бўлган Пакдел Эляснинг маҳоратини синовдан ўтказди. Драматик тарзда кечган беллашув Мауленин Абилкаийр фойдасига ҳал бўлди.

Бундан ташқари аёллар ўртасидаги беллашувлар ҳам қизиқарли баҳсларга бой ўтди.

Турнирнинг марказий учрашувларидан бири амалдаги жаҳон ва қитъа чемпиони, Осиё ўйинлари ғолиби Ҳилола Ортиқбоева ва эронлик Салимигҳалеҳтаки Арезоу ўртасида бўлди.

Тажрибали курашчи Ҳилола Ортиқбоева рақибини бир чала ва бир ёнбош баҳоси билан таслим этди ва турнир ғолиблигини қўлга киритди.

Яна бир ҳаяжонли финал баҳси Хитой тайпейилик Леэ Ван-Тинг ва Комила Қаҳҳорова ўртасида ўтказилди.

Леэ Ван-Тинг амалдаги Осиё чемпиони ҳисобланади. Ўтган йили жаҳон чемпионати ва «World Seriyes Pro» 2023да совриндор бўлган эди.

Сўнгги сонияларгача нафақат мухлисларни, балки ҳакамларни ҳам ҳаяжонга солган финал учрашуви Хитой тайпейилик курашчининг фойдасига ҳал бўлди. Леэ Ван-Тинг жорий йилда турнирнинг олтин медали билан ўз ватанига қайтадиган бўлди.

Шунингдек, эркаклар ўртасида +100 кг. вазн тоифасида ҳам азалий рақиблар тўқнаш келди.

Жаҳон ва қитъа чемпиони, Осиё ўйинлари ва қатор халқаро турнирлар ғолиби Муҳсин Ҳисомиддинов тожикистонлик Шакармамад Мирмамадовнинг маҳоратини яна бир бор синовдан ўтказди.

Учрашувнинг бошланиши билан жароҳат олган Муҳсин полвон қийин кечган баҳсни якунда ўз фойдасига ҳал этди. У ўз совринлари қаторига «World Seriyes Pro» турнири 2 карра ғолиби деган шарафли номни қўшиб қўйди.

Турнир низомига кўра олтин медал соҳиблари 10 минг АҚШ доллари, кумуш медал соҳиблари 5 минг АҚШ доллари ва бронза медали совриндорлари 1 минг АҚШ доллари билан тақдирланди.

Эътиборли жиҳати, мазкур кураш турнири миллий спортимиз халқаро спорт майдонида ўз жозибаси, инсонпарварлик тамойиллари туфайли кенг ривожланаётганини яна бир карра исботлади. Бу эса қадриятларимиз, ота-боболаримиздан мерос анъаналар жаҳон спортининг дурдонаси сифатида қадр топаётганидан далолат, дейиш мумкин.

Т.Рўзиев, ЎзА