“Ўзбек геология қидирув” акциядорлик жамиятига “S&P Global Ratings” халқаро рейтинг агентлиги томонидан “B”– “Барқарор” даражасидаги рейтинг берилди. Бу кўрсаткич жамиятнинг молиявий барқарорлигини тасдиқлаб, сармоядорлар ва мижозлар ишончини янада мустаҳкамлашга хизмат қилади. Шунингдек, у ташкилотда амалга оширилаётган ислоҳотларни янада чуқурлаштиришга ёрдам беради.

Мазкур натижага Ўзбекистон Республикаси Президентининг 2022 йил 14 июлдаги қарори доирасида эришилди. Унга кўра, жамият фаолиятини таҳлил қилиш учун “S&P Global Ratings” халқаро рейтинг агентлиги жалб этилди. 2022-2024 йиллар кўрсаткичлари ва 2025 йил учун прогноз асосида жамият “B” – “Барқарор” халқаро кредит рейтингига лойиқ топилди.

Таҳлилларга кўра, ташкилот хатарларни самарали бошқариб, юқори операцион самарадорликка эришиш орқали даромад кўрсаткичларини ошириш имкониятига эга.

Тоғ-кон саноати ва геология вазирлиги ахборот хизматининг маълум қилишича, “S&P Global Ratings” халқаро рейтинг агентлиги молиявий ва товар бозорларида етакчи бўлган “S&P Global” (NYSE: SPGI) компанияси таркибига киради. Унинг кредит рейтинглари ва тадқиқотлари кўплаб компанияларга иқтисодий режаларни шакллантиришда кўмак беради.

Н.Зиёдуллаева тайёрлади, ЎзА