Кеча Қатар пойтахти Доҳа шаҳрида шахмат бўйича мукофот жамғармаси 94 минг 250 АҚШ долларидан иборат “Qatar Masters-2024” турнирининг “А” ва “В” гуруҳларида илк тур баҳслари бўлиб ўтди. Турнирнинг ҳар икки гуруҳида умумий ҳисобда 278 нафар шахматчи қатнашмоқда: “А” гуруҳида – 138 нафар, “В” гуруҳида – 140 нафар. Ўзбекистонлик шахматчиларнинг 37 нафари Қатар баҳсларида иштирок этаётган бўлса, “А” гуруҳида 15 нафар, “В” гуруҳида 22 нафар ёш шахматчиларимиз дона сурмоқда.
Халқаро шахмат федерацияси рейтингида 2300 рейтинг очкосидан юқори шахматчилар иштирок этаётган “А” гуруҳининг ортда қолган дастлабки турида Шамсиддин Воҳидов ва Афруза Ҳамдамова ғолибликка эришган бўлса, Ортиқ Нигматов, Баҳром Бахруллаев, Абдумалик Абдусалимов, Муҳиддин Мадаминов, Саидакбар Саидалиев, Муҳаммадзоҳид Суяров, Ҳумоюн Бегмуратов, Алмас Раҳматуллаев дурангга эришди.
“Qatar Masters-2024” турнирида иккинчи рақам остида таснифланган ҳамюртимиз Нодирбек Абдусатторов дастлабки турда оқ доналарда ўйнашига қарамай, рейтингда ўзидан анча қуйида бораётган эронлик Реза Маҳдавига ютқазиб қўйди. Нодирбек Ёқуббоев ҳам илк турда ҳиндистонлик Амит Мокш Дошига таслим бўлди. Истеъдодли гроссмейстеримиз Шамсиддин Воҳидов 1-турда қора доналарда вьетнамлик Ле Пам Нгуен билан кураш олиб бориб, Доҳага катта ниятларда келганлигини амалда исботлади. Ёшлар ўртасида жаҳон чемпиони Афруза Ҳамдамова ушбу турда қора доналарда ҳаракат қилган вазиятда италиялик гроссмейстер Лоренцо Лодикини мағлуб эта олди.
Ўтган ҳафта Тошкентда ўтган “Президент кубоги-2024” турнирида ўз маҳоратини кўрсатган Ортиқ Нигматов Доҳа турнирининг 1-турида қора доналарда ҳиндистонлик Криштиано Маниш билан дурангга эришди.
Бугун, 4 декабрь куни “Qatar Masters-2024” турнирининг 2-турида Шамсиддин Воҳидов ҳиндистонлик Гутам Кришна билан, Афруза Ҳамдамова ФИДЕ байроғи остида мусобақада қатнашаётган Владислав Артьмев билан куч синашади. Ўзбекистоннинг биринчи рақамли шахматчиси Нодирбек Абдусатторов ушбу турда қора доналарда Бирлашган Араб Амирликлари вакили Омран ал Хасани қаршилигини енгишга бел боғлайди. Нодирбек Ёқуббоев бўлса, оқ доналарда Шотландия шарафини ҳимоя қилаётган Мурод Абдулла билан рўбарў келади. Биринчи турдан сўнг турнир жадвалини Нодирбек Абдусатторовдан шов-шувли тарзда очко тортиб олган Реза Маҳдави қўшимча кўрсаткичларга кўра, бошқариб турибди. 2-поғонада эса Ёқуббоевни енгган Амит Мокш бормоқда.
9 та турдан иборат “Qatar Masters-2024” ўйинлари 12 декабрга қадар давоми этади.
Т.Рўзиев, ЎзА