Маҳалла аҳолиси ичимлик сув билан таъминланади
Элликқалъа туманидаги “Ифтихор” маҳалла фуқаролар йиғинида яшовчи 846 та хонадон марказлашган ичимлик сув билан таъминланади. Маҳаллада янгидан 44 километр узунликда янги ичимлик сув қувурлари ва 1 та сув тақсимлаш иншооти қуриш ишлари амалга оширилмоқда.
Лойиҳа доирасида қуввати 500 м3 дан иккита резервуар, жами 1000 м3 бўлган 5 та сув етказиб бериш насоси қурилиши режалаштирилган. Лойиҳа қиймати 11 миллиард 500 миллион сўмни ташкил қилади. Қурилиш ишлари якунлангандан кейин маҳаллада яшовчи 846 та хонадон марказлашган ичимлик сув билан таъминланади.
Андижон вилояти ҳокимлиги кўмагида
Ўзбекистон Республикаси Вазирлар Маҳкамасининг 2023 йил 2 февралдаги “Қорақалпоғистон Республикасида аҳоли учун муносиб турмуш шароитларини яратиш ва маҳаллалар инфратузилмасини янада яхшилаш чора-тадбирлари тўғрисида”ги қарори ижроси юзасидан Кегейли туманида кенг кўламли ишлар амалга оширилмоқда.
Мазкур қарор асосида ўтказилган хатловда оғир турмуш шароитидаги оилаларга тегишли 920 та уй-жойнинг том қисмини таъмирлаш (ёпиш) ҳамда 2 та яшаш учун яроқсиз ҳолдаги уй-жойни янгидан қуриш белгиланди. Туманга бириктирилган Андижон вилояти ҳокимлиги томонидан ушбу ишларга 13,2 миллиард сўм маблағ ажратилиб, қурилиш ишлари жадал олиб борилмоқда.
Бугунги кунда 16 та маҳалла ва овул фуқаролар йиғинидаги 300 тага яқин уй-жойнинг том қисми таъмирланиб, 2 та уй-жой янгидан қуриб берилди. Жумладан, “Жалпақ жап” овул фуқаролар йиғинида истиқомат қилувчи Қирмизи Ўтениязова шу кунга қадар яроқсиз бир хонали уйда яшаб келган бўлса, эндиликда янги 7 та хонали уй-жойнинг бекасига айланди.
Мусобақа ғолиблари тақдирланди
Нукусдаги 1-сонли спорт мактабида мини футбол бўйича “Қорақалпоғистон Республикаси Спорт вазири кубоги” мусобақаси бўлиб ўтди.
Унда барча шаҳар ва туманлар спорт мактаблари жамоалари ўзаро беллашди. Қизғин беллашувларга бой бўлган мусобақада биринчи ўринни Ўзбекистон давлат жисмоний тарбия ва спорт университети Нукус филиали, иккинчи ўринни Нукус тумани спорт мактаби, учинчи ўринни эса Тахиатош тумани спорт мактаби жамоалари эгаллади.
Мусобақа ғолиблари ташкилотчилар томонидан диплом, медаль ҳамда қимматбаҳо совғалар билан тақдирланди.
Биринчи ўринни қўлга киритган жамоа “Ўзбекистон Республикаси Спорт вазири кубоги” мусобақасига йўлланмани қўлга киритди.
Довуд Абибуллаев, ЎзА мухбири.