Mahalla aholisi ichimlik suv bilan ta’minlanadi
Ellikqal’a tumanidagi “Iftixor” mahalla fuqarolar yig‘inida yashovchi 846 ta xonadon markazlashgan ichimlik suv bilan ta’minlanadi. Mahallada yangidan 44 kilometr uzunlikda yangi ichimlik suv quvurlari va 1 ta suv taqsimlash inshooti qurish ishlari amalga oshirilmoqda.
Loyiha doirasida quvvati 500 m3 dan ikkita rezervuar, jami 1000 m3 bo‘lgan 5 ta suv yetkazib berish nasosi qurilishi rejalashtirilgan. Loyiha qiymati 11 milliard 500 million so‘mni tashkil qiladi. Qurilish ishlari yakunlangandan keyin mahallada yashovchi 846 ta xonadon markazlashgan ichimlik suv bilan ta’minlanadi.
Andijon viloyati hokimligi ko‘magida
O‘zbekiston Respublikasi Vazirlar Mahkamasining 2023 yil 2 fevraldagi “Qoraqalpog‘iston Respublikasida aholi uchun munosib turmush sharoitlarini yaratish va mahallalar infratuzilmasini yanada yaxshilash chora-tadbirlari to‘g‘risida”gi qarori ijrosi yuzasidan Kegeyli tumanida keng ko‘lamli ishlar amalga oshirilmoqda.
Mazkur qaror asosida o‘tkazilgan xatlovda og‘ir turmush sharoitidagi oilalarga tegishli 920 ta uy-joyning tom qismini ta’mirlash (yopish) hamda 2 ta yashash uchun yaroqsiz holdagi uy-joyni yangidan qurish belgilandi. Tumanga biriktirilgan Andijon viloyati hokimligi tomonidan ushbu ishlarga 13,2 milliard so‘m mablag‘ ajratilib, qurilish ishlari jadal olib borilmoqda.
Bugungi kunda 16 ta mahalla va ovul fuqarolar yig‘inidagi 300 taga yaqin uy-joyning tom qismi ta’mirlanib, 2 ta uy-joy yangidan qurib berildi. Jumladan, “Jalpaq jap” ovul fuqarolar yig‘inida istiqomat qiluvchi Qirmizi O‘teniyazova shu kunga qadar yaroqsiz bir xonali uyda yashab kelgan bo‘lsa, endilikda yangi 7 ta xonali uy-joyning bekasiga aylandi.
Musobaqa g‘oliblari taqdirlandi
Nukusdagi 1-sonli sport maktabida mini futbol bo‘yicha “Qoraqalpog‘iston Respublikasi Sport vaziri kubogi” musobaqasi bo‘lib o‘tdi.
Unda barcha shahar va tumanlar sport maktablari jamoalari o‘zaro bellashdi. Qizg‘in bellashuvlarga boy bo‘lgan musobaqada birinchi o‘rinni O‘zbekiston davlat jismoniy tarbiya va sport universiteti Nukus filiali, ikkinchi o‘rinni Nukus tumani sport maktabi, uchinchi o‘rinni esa Taxiatosh tumani sport maktabi jamoalari egalladi.
Musobaqa g‘oliblari tashkilotchilar tomonidan diplom, medal hamda qimmatbaho sovg‘alar bilan taqdirlandi.
Birinchi o‘rinni qo‘lga kiritgan jamoa “O‘zbekiston Respublikasi Sport vaziri kubogi” musobaqasiga yo‘llanmani qo‘lga kiritdi.
Dovud Abibullayev, O‘zA muxbiri.