Мамлакатимиз Қишлоқ хўжалиги вазирлигида бўлиб ўтган Япониянинг “Aglis Co.Ltd” компанияси вакиллари билан учрашувда икки томонлама ҳамкорлик масаласи ҳамда бир неча лойиҳалар бўйича олиб борилаётган ишлар муҳокама қилинди.

Хусусан, Ўзбекистонга киви кўчатини олиб кириб, экиш ҳамда ушбу ўсимлик чангини кун чиқар юртга экспорт қилиш борасида қатор таклифлар берилди. Бунинг учун 4000 дона кўчат келтириш фикри маъқулланди.

Мазкур ҳамкор давлатда қишлоқ хўжалиги соҳаси учун малакали кадрларга эҳтиёж борлигини маълум қилган меҳмонлар юртимиздаги қишлоқ хўжалиги йўналишидаги коллеж, университетларда япон тилини ўқитиш режаси билдирди. Ўзбекистонлик ёш талабаларни махсус малака тестига тайёрлаб, Япония компанияларига ишга таклиф қилиш асосий мақсад экани қайд этилди.

Вазирлик масъуллари ҳамкорликка тайёрлиги, бугунги кунда аграр таълим соҳасидаги ҳар қандай қўшма ҳаракат мамлакатларимиз ўртасида тажриба алмашиш имконини ошириши таъкидланди.

Учрашув якунида томонлар келишилган вазифалар ижросини таъминлаш учун “Ишчи гуруҳ” шакллантириш бўйича тўхтамга келишди.