Компьютер ва спорт. Бир-биридан узоқ, таъбир жоиз бўлса, иккита қутбдаги нуқталар сифатида қаралган соҳалар XXI асрга келиб коммуникациянинг ривожланиши, дунёда рақамлаштириш жараёнларининг изчил кечиши оқибатида битта майдонда – фижитал мусобақалари тизимида бирлашди.

Бугун футбол, баскетбол, хоккей, велоспорт, стол тенниси каби ўнлаб спорт турлари ўзининг иккинчи қаноти – фижитал билан бойитилмоқдаки, бу, иштирокчи ва қизиқувчилар қамрови ошишига олиб келмоқда.

Фижитал сўзи инглизча physical (жисмоний) ва digital (рақамли) сўзларининг бирлашувидан келиб чиққан бўлиб, ушбу форматнинг пайдо бўлишининг асосий ғояси электрон спортчиларни виртуалликдан очиқ майдонга олиб чиқишга қаратилган. Бошқача айтганда, спортчилар фижитал залларида аввал мониторда қўлларида жойстик билан рақобатлашиб, сўнгра очиқ майдонда юзма-юз куч синашади.

Буни фақат компьютер билимлари билан боғланиб, ақл курашига берилган ёшларни спорт ва жисмоний тайёргарлик баҳсларига чорлашнинг янгича формати бўлди, дейиш мумкин.

Дунёнинг кўплаб давлатларида бўлгани каби мамлакатимизда ҳам мазкур йўналишни ривожлантириш, ушбу тизимда мусобақалар ўтказиш, иқтидорлиларнинг билим ва жисмоний фаоллигини рўёбга чиқаришга эътибор қаратилмоқда.

Жорий йилнинг февраль ойида ташкил этилган Ўзбекистон Фижитал спорт федерацияси қисқа фурсатда минглаб ёшларни бирлаштиришга, уларни шиддатли беллашувларга жалб қилишга муваффақ бўлди.

– Ўзбекистонда фижитал спорт тизими ривожига давлатимиз томонидан алоҳида эътибор берилиши қисқа фурсатда ўз натижасини берди. Жорий йилнинг 21 февраль-3 март кунлари Россиянинг Қозон шаҳрида илк бор ташкил этилган, 107 та мамлакатдан 227 та жамоа, 2000 нафардан зиёд спортчи иштирок этган «Келажак ўйинлари» мусобақасида  ҳамюртларимизнинг фижитал ралли бўйича 2-ўринни қўлга киритгани тарихий натижа бўлди. Яна бир аҳамиятли жиҳат, бугунги кунда юртимизда виртуал велоспорт, спорт дастурлаши, фижитал-хоккей ва фижитал-пойга йўналишларида мусобақалар ўтказилиши йўлга қўйилди. 11 июндан Қозон шаҳрида бошланадиган «Брикс» ўйинларида ҳам фижитал мусобақаларининг ўтказилиши белгиланган. Юртимизнинг фижитал баскетболчилари баҳсларда қатнашишга ҳозирлик кўрмоқда, – дейди Ўзбекистон Фижитал спорт федерацияси мутахассиси Ҳусан Насруллаев.

Дарҳақиқат, фижитал спортини ривожлантириш, ҳам жисмоний, ҳам интеллектуал жиҳатдан иқтидорли спортчиларни танлаб олиш орқали терма жамоаларни шакллантириш, уларнинг халқаро мусобақаларда иштирокини таъминлаш муҳим вазифа саналади. Айни ҳаракатлар эса 2026 йилги «Келажак ўйинлари» халқаро мусобақасининг мамлакатимизда ўтказилишига тайёргарликнинг муҳим босқичидир.

Тўлқин Рўзиев, ЎзА