Айни кунларда «Ўзэлтехсаноат» уюшмаси раиси ўринбосари Жаҳонгир Жамолов бошчилигидаги делегация хизмат сафари билан Туркияда бўлиб турибди.
«Ўзэлтехсаноат» уюшмаси ахборот хизматининг хабарига кўра, мамлакатимизда автомобиллар ишлаб чиқариш, янги қувватларни ишга тушириш ҳисобига автосаноат тармоғида электротехника бутловчи қисмларига бўлган талаб ортиб бормоқда.
Шундан келиб чиқиб, делегациянинг ушбу хизмат сафаридан кўзланган мақсад мазкур йўналишда янги инвестиция лойиҳаларини амалга ошириш бўйича етакчи хорижий компаниялар билан музокараларни ташкил этиш ва амалий натижаларга эришишга қаратилган.
Сафар чоғида «Ўзэлтехсаноат» уюшмаси ва «EltechIndustrial» технопарки давлат муассасаси вакиллари Туркиянинг «DAIICHI Electronic» компанияси ҳамда унинг ҳамкори бўлган «Karel» компаниясида бўлди.
Томонлар ўртасида ўтказилган учрашувда «DAIICHI Electronic» компаниясининг юртимизда автомобиллар учун аудио-радио қурилмалар ишлаб чиқариш лойиҳаси тақдимот қилинди. Сўнгра ўзбек делегацияси «Karel» компаниясидаги ишлаб чиқариш жараёнлари, маҳсулот турлари ва технологик янгиликлар билан яқиндан танишди.
Учрашув якунида томонлар ўзаро маълумот алмашишга, янги лойиҳа реализациясини имкон қадар тезлаштиришга умид билдирди.
Н.Зиёдуллаева тайёрлади
ЎзА