Пойтахтимиздаги “Ўзэкспомарказ” марказий кўргазмалар мажмуида бу гал мебель ва ёғочсозлик саноатининг энг илғор технологияси ва ускуналарига кенг ўрин берилади.
Жорий йилнинг 28-30 май кунлари ўтказиладиган “Ишлаб чиқариш технологиялари. Ёғочсозлик. Мебель ва бутловчи қисмлар – Mebel Expo Uzbekistan 2024» 20-юбилей халқаро кўргазмасида 14 мамлакатдан 144 та компаниянинг иштирок этиши кутилмоқда.
«Iteca Exhibitions» халқаро кўргазмалар компанияси менежери Нодира Ҳайитбоеванинг сўзига кўра, юбилей кўргазма ишида ёғочсозлик ва мебель, бутловчи қисмлар, мебель кимёси, фурнитура, аксессуарлар, тайёр мебеллар ва бошқа маҳсулотларни ишлаб чиқариш учун юқори технологияли замонавий ускуналар ишлаб чиқарувчилари ва етказиб берувчилари ўз экспозициясини ҳавола этади.
–Ўзбекистон Марказий Осиё минтақасидаги энг йирик истеъмол бозори бўлиб, аҳолиси 37 миллиондан ошади. Турар-жой мажмуалари, ижтимоий инфратузилма объектлари, офис бинолари ва бизнес марказларининг кенг кўламли қурилиши тайёр мебель ва интерьер жиҳозларига талабнинг ортиб боришига олиб келмоқда. Аҳолининг сотиб олиш қобилияти ўсиб бормоқда, бу эса маҳаллий ва хорижий ишлаб чиқарувчиларнинг мебель бозорида таклифининг ошишига олиб келади.
Мамлакатнинг мебель ва ёғочсозлик саноатида асосан кичик ва ўрта бизнес субъектлари фаолият юритмоқда. Ушбу соҳа иқтисодиётнинг энг жадал ривожланаётган тармоқлари қаторига киради.
20 йил давомида “Mebel Expo Uzbekistan” соҳанинг асосий халқаро кўргазма тадбиридир. Кўргазма мижозларнинг юқори ишончи, барқарорлиги ва инновацияси билан ажралиб туради ва мебель саноатининг ривожланишига муносиб ҳисса қўшади. Мавжуд ишлаб чиқариш жараёнларини техник замонавийлаштириш ва жиҳозлашга ёрдам беради. Шу билан бирга, мебель ишлаб чиқарувчиларига замонавий технологиялар, ускуналар, хомашё ва бутловчи қисмлардан тўғридан-тўғри фойдаланиш имкониятини беради. Ишончли ҳамкорлар ва етказиб берувчилар билан ўзаро ҳамкорликка кенг йўл очиб беради.
Таъкидланганидек, кўргазмада Австрия, Беларусь Республикаси, Германия, Эрон, Италия, Қозоғистон, Хитой, Қирғизистон каби 14 мамлакатдан 144 та компания иштирок этади. Шунингдек, Туркия миллий павильони, Россия Федерациясининг Ярославл области компанияларининг жамоавий стенди тақдим этилади.
Насиба Зиёдуллаева, ЎзА