Пойтахтимизда Ипакчилик ва жун саноатини ривожлантириш қўмитаси раиси Иқболжон Эргашев ва Вьетнам Ипакчилик уюшмаси таркибидаги «ҲА БАО СИЛК» компанияси, «МИНҲСАНГ» компанияси ҳамда «ТРУОНГ ТҲАИ ТЕА» компаниялари раҳбарларидан иборат делегация азолари ўртасида учрашув бўлиб ўтди.
Мазкур учрашувда икки томон учун манфаатли бўлган меморандум имзоланди.
Меморандумда Ўзбекистондаги ипакчилик корхоналарида ишлаб чиқарилаётган хом ипак сифатини яхшилаш бўйича мутахассислар жалб қилиш, пиллачилик кластерлари билан биргаликда ипакни эшиш ва мато ишлаб чиқариш бўйича қўшма корхоналар ташкил этиш, ташкил этилган қўшма корхоналарни малакали мутахассислар билан таъминлаш, ишлаб чиқарилган мато ва ипак маҳсулотлари экспортини таъминлаш масалалари ўрин олди.
Шунингдек, пилла етиштиришда Вьетнам тажрибасини жорий қилиш, ўрма тутзорларни барпо этиш, малакали мутахассисларни жалб этган ҳолда сифатли ипак олишга эришиш мазкур ҳамкорликнинг ўзаги ҳисобланади. Учрашувда ана шу жиҳатларга эътибор қаратилди.
Учрашувдан сўнг вьетнамлик меҳмонлар «Ўзбекипаксаноат» уюшмаси ипак маҳсулотлари шоуруми билан таништирилди.
Гулноза Бобоева,
ЎзА