Хабарингиз бор, ЎзА Таиландда ўтаётган футзал бўйича Осиё кубоги мусобақасини мунтазам кузатиб, ўз ўқувчиларини мазкур турнир доирасидаги воқеалардан хабардор қилиб боряпти.

Ўзбекистон терма жамоаси айни пайт “В” саралаш гуруҳида 100 фоизлик натижа кўрсатиб, 3 ғалаба билан чорак финалга чиққан. Ҳамюртларимиздан кейин гуруҳда 2-ўринни эгаллаган Ироқ ҳам плей-оффга йўлланма олган. Саудия Арабистони ва Австралия жамоалари кураш майдонини тарк этган.

Ярим финал йўлланмасига асосий даъвогар сифатида эътироф этилаётган футзалчиларимиз 24 апрель куни бошқа саралаш гуруҳидан 2-ўрин билан чорак финал йўлланмасини қўлга киритган Вьетнам қаршилигини енгишларига тўғри келади. Эртага Тошкент вақти билан соат 19.00 да бошланадиган ушбу матч руҳий жиҳатдан ҳал қилувчи аҳамиятга эга эканлиги табиий.

Келинг, йигитларимизни биргаликда қўллаб-қувватлаймиз!

Ғ.Хонназаров, ЎзА