Yandex Go мобиль иловаси Ўзбекистонда таксига буюртма бериш учун янги корпоратив хизматни йўлга қўйди. Ҳозирча бу хизматдан фақат Тошкентдаги компаниялар фойдаланишлари мумкин, бироқ кейинчалик уни мамлакатимизнинг бошқа шаҳарларида ҳам йўлга қўйиш режалаштирилган.
Yandex Go мобиль иловасидан маълум қилишларича, бу фирма ва компаниялар ходимларининг корпоратив ташрифларини ташкиллаштириш, ҳамкорлар ва мижозларни олиб келиш учун буюртма бериш ҳамда бошқа корпоратив мақсадлар учун фойдалидир.
Бунинг учун компания ўз ходимини ушбу хизматга улаб қўйиши керак бўлади, шунда ходимнинг иловасида «Бизнес-аккаунт» тўлов тури пайдо бўлади. Ишчи ходим кейинги сафар мобиль илова орқали таксига буюртма берганда, сафар учун тўлов корпоратив ҳисобдан ечиб олинади ва барча маълумотлар компания аккаунтида пайдо бўлади. Ҳар бир ходим учун маблағ, сафар вақти ва географияси бўйича чекловлар ўрнатиш ҳамда унга мос бўлган тарифларни танлаш мумкин.
Yandex Go матбуот хизмати янги сервисдан фойдаланиш истагида бўлган компаниялардан илк аризалар келиб тушганини маълум қилди.
Роман БОНДАРЧУК тайёрлади, ЎзА