Қатар давлати ахборот агентлиги – QNA Тошкентда бўлиб ўтган “Марказий Осиё – Кўрфаз араб давлатлари ҳамкорлик кенгаши” Стратегик мулоқоти ташқи ишлар вазирларининг иккинчи учрашувини кенг ёритмоқда.

Қатар делегациясига бошчилик қилган Бош вазир ва ташқи ишлар вазири Шайх Муҳаммад бин Абдураҳмон бин Жасим Ол Соний сессия очилишида сўзлаган нутқида, ушбу учрашув муносабатларни  мустаҳкамлашга бўлган самимий истакни ифодалашини, шунингдек, Форс кўрфази ҳамкорлик кенгаши имкониятлари ва кучли томонларидан фойдаланишга қаратилганлигини таъкидлади.

–Биз кейинги босқичда Кўрфаз ҳамкорлик кенгаши ва Марказий Осиё давлатлари ўртасидаги дўстлик ва минтақавий алоқалар тўғрисидаги шартнома лойиҳасининг тафсилотларини муҳокама қилишни интиқлик билан кутмоқдамиз, – деди Қатар Бош вазири ва ташқи ишлар вазири Шайх Муҳаммад бин Абдурахмон бин Жасим Ол Соний.

Мулозим ушбу халқаро йиғин бугунги кунда мамлакатларимизга тааллуқли бўлган кўплаб глобал муаммолар нуқтаи назаридан ўтказилаётганини ва мамлакатларимиз иқлим ўзгаришидан тортиб то глобал озиқ-овқат хавфсизлиги инқирозигача бўлган турли соҳалардаги муаммоларни ҳал қилишга биргаликда ҳисса қўшиши мумкинлигини таъкидлади.

Унинг қўшимча қилишича, ўтган кунларда минтақа гувоҳи бўлган кескинлашув минтақавий барқарорлик ва тинчликни сақлашни таъминлаш мақсадида минтақанинг турли мамлакатлари ўртасида самарали мулоқот ва мувофиқлаштиришни давом эттириш, барқарорликни бузиши ёки тинчликка путур етказиши мумкин бўлган ҳар қандай кескинликни камайтириш зарурлигини яққол кўрсатиб турибди.

Шунингдек, у ўз нутқи якунида Қатар Фаластин муаммосини адолатли ва кенг қамровли ҳал этиш асосида тинчлик жараёнига эришиш йўлидаги саъй-ҳаракатлари давом этаётганига тўхталиб ўтди.

Муҳаррама Пирматова, ЎзА