Тошкентда сиёсий партиялар аёл вакилларининг етакчилик салоҳиятини ошириш бўйича беш кунлик ўқув-амалий машғулотларга старт берилди.

Тадбир Ўзбекистон Республикаси Олий Мажлиси Сенати, Хотин-қизларнинг жамиятдаги ролини ошириш, гендер тенглик ва оила масалалари бўйича республика комиссияси ва БМТ Тараққиёт дастури ҳамкорлигида ташкил этилди.

Айтиб ўтиш керакки, кейинги йилларда Ўзбекистонда хотин-қизларнинг ҳуқуқлари, эркинликлари ва қонуний манфаатларини таъминлашга қаратилган 50 дан ортиқ қонун ҳужжати қабул қилинди.

Янгиланган Конституциянинг 58-моддасида хотин-қизлар ва эркаклар тенг ҳуқуқлилиги, давлат хотин-қизлар ва эркакларга жамият ҳамда давлат ишларини бошқаришда, шунингдек, жамият ва давлат ҳаётининг бошқа соҳаларида тенг ҳуқуқ ва имкониятларни таъминлаши кафолатланган.

Қонун билан сайловларда аёлларнинг иштироки сиёсий партиядан кўрсатиладиган депутатликка номзодларнинг камида 40 фоизини ташкил этиши белгиланди.

Ўзбекистон БМТ низомининг мақсад ва принципларига ҳамда халқаро ҳуқуқнинг бошқа умумэътироф этилган нормаларига содиқ эканини доимо кўрсатиб келган.

2023 йил 1 январда Парламентлараро иттифоқ томонидан эълон қилинган “Аёллар сиёсатда” жаҳон рейтингида дунёнинг 190 миллий парламенти орасида мамлакатимиз 45-ўринни эгаллади.

Ўтган йил сентябрь ойида эълон қилинган очиқ гендер маълумотлари индексида Ўзбекистон 69,7 балл билан дунёнинг энг яхши 20 мамлакати қаторига кирди.

БМТнинг Барқарор ривожланиш мақсадлари тармоғи ҳисоботига кўра Ўзбекистон 8 поғонага кўтарилди, 166 мамлакат орасида 69-ўринни эгаллади (2022 йилда 77-ўринда эди).

Тадбирдан кўзланган мақсад гендер тамойилларини сиёсий ҳаётда тарғиб қилувчилар бўлмиш миллий кадрлар захирасига киритилган номзодлар, сиёсий партияларнинг хотин-қизлар қанотлари ва маҳаллий Кенгашлар аъзоларининг салоҳиятини янада оширишдир.

Зеро, жамиятни демократлаштириш аёлларнинг мамлакат сиёсий ҳаётида фаол иштирок этишини тақозо этади.  Шиддатли ва мураккаб глобаллашув жараёнлари давом этаётган бир шароитда эса инсон ҳуқуқларининг ажралмас қисми сифатида хотин-қизлар ҳуқуқларини таъминлаш долзарб аҳамиятга эга.

Сиёсий қарорлар қабул қилиш нуқтаи назаридан аёл раҳбарлар камситишларга қарши курашиш учун қаттиқроқ чоралар кўриши исботланган. Семинар давомида бу борада уларнинг имкониятларини кенгайтириш учун зарур билим, кўникмалар ўргатилади.

Тадбир доирасида “Сиёсат соҳасидаги етакчи аёл: ўрнак бўладиган инсон” мавзусидаги энг яхши сценарийлар танловининг ғолибларини тақдирлаш маросими ҳам бўлиб ўтади.

Мазкур танлов жорий йилнинг март ойида Хотин-қизларнинг жамиятдаги ролини ошириш, гендер тенглик ва оила масалалари бўйича республика комиссияси ҳамда БМТ Тараққиёт дастурининг Ўзбекистондаги ваколатхонаси томонидан ташкил этилган.

Танловнинг асосий мақсади хотин-қизларнинг фаол сиёсий ҳаётга қизиқишини ошириш, замонавий етакчи аёл образини яратиш ҳамда ижтимоий фаол, етакчи, сиёсатчи аёллар ҳақида жамоатчиликда ижобий фикрни шакллантиришга қаратилган.

Н.Абдураимова,  

ЎзА