Нотариал ҳаракатларни амалга ошириш учун нотариус ҳузурига бориш, навбат кутиш, ўнлаб ҳужжат ва маълумотномалар тақдим этиш каби мураккаб жараён эндиликда ўтмишга айланмоқда.
Нотариус ҳузурига электрон навбатга ёзилиб, белгиланган вақтда бориб кўзланган ишни битириш мумкин. Кўчмас мулк билан боғлиқ нотариал ҳаракатлар амалга оширилаётганда турли қарздорликларга оид маълумотнома талаб қилинмайди.
Жуда кўп нотариал амалиётлар фуқаронинг биргина шахсини тасдиқловчи ҳужжати – паспорт асосида амалга оширилади. Фақат белгиланган тўловлар тўланса бас.
Эндиликда онлайн нотариал ҳаракатлар ҳам жорий этилмоқдаки, бунда нотариус ҳузурига бормасдан, видеомулоқот орқали ишни битириш мумкин. Адлия вазирлиги томонидан ишлаб чиқилган “E-notarius.uz” ахборот портали бунга имкон яратмоқда.
Масалан, автомототранспорт воситасини сотмоқчи бўлган шахс турмуш ўртоғининг розилиги ҳақидаги аризасини нотариал идорага бормасдан, уйда, ишхонада ёхуд дунёнинг исталган жойида туриб расмийлаштириши мумкин.
Айни пайтда онлайн амалга ошириладиган нотариал ҳаракатлар сони яна биттага кўпайди. Фарзанди чет элга олиб чиқилишини истаган шахс бунинг учун талаб этиладиган нотариал тасдиқланган розилик ҳужжатини нотариал идорага бормасдан, дунёнинг исталган жойида расмийлаштириши мумкин.
Бу ҳақда Адлия вазирлиги ахборот хизмати маълум қилди.
Бу жараёнда розилик берувчи “E-notarius.uz” ахборот порталида «Вояга етмаган фарзандини чет элга олиб чиқиш учун розилик» тугмасини танлайди. Тизимга ўзининг шахсига оид маълумотларни киритади ва нотариал ҳаракатни яратади.
Розилик берувчи қайси фарзанди чет элга олиб чиқилаётган бўлса, унинг ими-шарифини фарзандлар рўйхатидан танлайди. Шундан сўнг ҳамроҳлик қилувчи шахснинг шахсига оид маълумотларни киритади.
Шу тариқа автоматик тарзда ёки ихтиёрий нотариус танланади. Нотариус нотариал ҳаракатни расмийлаштиришга қабул қилиб, вақтни белгилайди ва тарафларнинг мобил телефонига СМС хабарнома юборади.
Белгиланган вақтда нотариус тарафлар иштирокида видеоконференцалоқа орқали нотариал ҳаракатни расмийлаштиради.
Ушбу нотариал ҳаракатни уйдан ёки иш жойидан чиқмаган ҳолда компьютер ёки мобил телефон орқали 15 минутда расмийлаштириш мумкин.
Мавзуга оид йўриқнома билан видео орқали танишишингиз мумкин.
Норгул Абдураимова, ЎзА