“Тошкент” халқаро аэропортида яна бир расмий такси хизмати иш бошлади. “Sixt Uzbekistan” бренди остидаги “Avtobus Rent” компанияси E-auksion.uz электрон платформасида ўтказилган савдолар орқали танлаб олинди.
“Uzbekistan Airports” маълумотларига кўра, янги такси хизматининг ишлаш тамойили фаолият кўрсатаётганига икки йил бўлган “Taxi Airport Tashkent” хизматиники каби ўхшаш: йўловчи учиб келиш залидаги пештахта ёнига келади, манзилни айтади, менежер тариф бўйича километрни ҳисоблайди ва хизмат ҳақини айтади.
Тўловни нақд пул ёки пул ўтказиш йўли билан ўша ернинг ўзида ёҳуд бевосита машинада амалга ошириш мумкин. Компания аэропортдаги фаолият учун бир нечта: “Стандарт”, “Комфорт” ва “Бизнес” тарифларини тақдим этади. Сафарнинг минимал нархи 60 минг сўмни ташкил этади.
Такси хизмати йўлга қўйилиши муносабати билан икки ҳафталик акция эълон қилди. Бунда 15 апрель санасигача учиб келган барча йўловчилар “Комфорт” тарифидан “Стандарт” тарифи нархларида фойдаланиши мумкин бўлади.
Такси хизмати автопарки Chevrolet, Toyota, Kia, Skoda, Hyundai, Golden Dragon каби маҳаллий ва хорижда ишлаб чиқарилган автомобиллар билан тўлдирилган. Зарурат пайдо бўлганда йўловчилар 6-19 ўринга мўлжалланган микроавтобуслар берилишини сўрашлари мумкин.
Роман БОНДАРЧУК тайёрлади, ЎзА