2023 йилнинг бошида Юнус Ражабий номидаги Ўзбек миллий мусиқа санъати институтида таълим олаётган талабалар учун санъатимизнинг чин маънодаги фидоийси, Ўзбекистон Қаҳрамони Муножат Йўлчиева номидаги стипендия таъсис этилган эди.

Институтнинг 2-курсини тугатган бакалавриат ҳамда 1-курсни тугатган магистратура босқичи талабаларига берилиши кўзда тутилган мазкур стипендия институт илмий кенгашининг хулосасига кўра, «Вокал санъати: (анъанавий хонандалик)» мутахассислиги магистрантлари Феруза Абдукаримова ҳамда Наргиза Бекбоевага топширилди.

– Талаба қизларимизни ушбу муваффақият билан табриклаймиз, – деди маданият вазири Озодбек Назарбеков. – Муносиблик эътирофи муборак ва бардавом бўлсин!

Дарҳақиқат, Ўзбекистон халқ артисти, устоз санъаткор Муножат Йўлчиева номи билан юритилувчи стипендия соҳиби бўлиш ёш хонандалардан катта маҳорат, юксак масъулият талаб этади.

Н.Усмонова,  

ЎзА