Бугун Энергетика вазирлигида сенатор Стивен Дэйнс бошчилигидаги АҚШ делегацияси билан учрашув ўтказилди.
Унда Ўзбекистон Республикаси энергетика вазири Жўрабек Мирзамаҳмудов, тоғ-кон саноати ва геология вазири Бобир Исломов ва бошқа масъуллар иштирок этди.
Вазирлик ахборот хизматига кўра, мулоқот чоғида томонлар барча йўналишлар қатори ёқилғи-энергетика ҳамда тоғ-кон саноати ва геология-қидирув соҳаларида олиб борилаётган изчил ҳамкорлик натижаларига алоҳида эътибор қаратди.
Жумладан, “Air Products”, “Schlumberger”, “Honeywell UOP” сингари компаниялар билан нефть-газ соҳасида, “General Electric” компанияси билан электр энергияси тармоғида бир қатор истиқболли лойиҳалар амалга оширилмоқда. USAID ташкилоти билан эса “Марказий Осиё энергетикаси” ва “Келажак энергияси” лойиҳалари бўйича ҳамкорликда ишланмоқда.
Шунингдек, томонлар мазкур йўналишларда ўзаро алоқаларни янада чуқурлаштириш учун катта имкониятлар мавжудлиги ва келгусида бундан самарали фойдаланиш икки тараф учун ҳам амалий аҳамият касб этишини қайд этди.
Н.Зиёдуллаева тайёрлади,
ЎзА