Нидерландияда ўтказилган жаҳон кубогининг иккинчи босқичида Бобур Аҳмадалиев ва Екатерина Хилко мураббийлигидаги терма жамоамиз аъзолари муваффақиятли иштирок этди.
Дунёнинг 15 давлатидан маҳоратли спортчилар иштирок этган мусобақада терма жамоамиз аъзолари Миршоҳид Ҳасанбоев ва Яҳёбек Мўминов яккалик ва синхрон сакрашда имкониятларини намойиш этди. Мусобақанинг дастлабки кун саралаш беллашувлари спортчимиз Миршоҳид учун омадли келди. У финал баҳсининг яккалик дастурида 57.095 баллга эга бўлиб, кумуш медалга сазовор бўлди.
Жаҳон кубогининг синхрон сакраш дастурида маҳоратини намойиш этган Миршоҳид Ҳасанбоев ва Яҳёбек Мўминов беллашувларни 7-ўринда якунлашга муваффақ бўлди.
Айтиш лозим, жорий йил трамплин бўйича жаҳон кубогининг бешта босқичи ўтказилиши белгиланган. Дастлабки босқич Озарбайжоннинг Боку шаҳрида ўтган бўлса, вакилларимизга омад келтирган Нидерландияда поёнига етган жаҳон кубогининг иккинчи босқичидан бир ҳафта ўтиб жаҳон кубогининг учинчи босқичи Германияда старт олади. Қолган иккита босқич мусобақалари эса ёз ойида Швейцария ва Португалия давлатларида ташкил этилади.
Жаҳон кубогида иштирок этган спортчиларимиз эртага Тошкентга қайтиб келади.
Т. Рўзиев, ЎзА