Геология фанлари университетида Ўзбекистонда литий куни (Lithium day Uzbekistan 2024) конференцияси бўлиб ўтди. Мазкур тадбир Тоғ-кон саноати ва геология вазирлиги, Германиянинг “Deutsches Lithiuminsititut” институти ҳамда GP Papenburg AG компаниялари билан ҳамкорликда ташкил этилди.

Тадбирда халқаро литий бозори иштирокчилари, Германия, Буюк Британия ва Финляндия давлатларидан соҳа мутахассислари, “Олмалиқ КМК” АЖ, “Навоий КМК” АЖ, “Навоийуран” ДК, Геология фанлари университети, “Янги кон” МЧЖ, “Ўзгеорангметлити” МЧЖ, хорижий консалтинг компаниялари ва бошқа ташкилотлар вакиллари қатнашди.

Тоғ-кон саноати ва геология вазирининг биринчи ўринбосари О.Насритдинходжаев очиб берган тадбирда халқаро литий бозори иштирокчилари, хорижий компаниялар вакиллари, хусусан Германиянинг Ўзбекистондаги Фавқулодда ва мухтор элчиси, доктор Тило Клиннер, GP Günter Papenburg AG компанияси раҳбари Ангела Папенбург хонимга миннатдорлик билдирилди.

Анжуман “Ўта муҳим минералларнинг глобал тенденциялари”, “Бирламчи хомашё ва литийдан олинадиган қўшимча маҳсулотлар. Литийни қайта ишлаш технологиялари” каби мавзулар асосида иккита панель сессия тарзида ўтказилди.

Жумладан, биринчи панель сессиясида спикерлар томонидан “Ўзбекистонда муҳим фойдали қазилмаларнинг ривожланиши”, “Германиянинг Марказий Осиё стратегияси бўйича тақдимоти”, “Ўзбекистонда литий ва муҳим минераллар қазиб олиш лойиҳалари, “Халқаро литий лойиҳалари доирасида геология ва минерал ресурсларни баҳолаш” масалалари юзасидан тақдимотлар қилинди.

Иккинчи сессияда “Литий рудаларини қайта ишлаш учун Metso, FLSmidth KBR, GEA engineering каби халқаро компаниялар ўзининг критик металларни қайта ишлашдаги технологик ечимлари ва тажрибаларини намойиш этди. Бундан ташқари, тадбирда соҳада изланишлар олиб бораётган мамлакатимиздаги илмий тадқиқот ташкилотлари олимлари ва ишлаб чиқаришдаги илғор тажрибага эга ходимлар ўзларининг ишланмалари ҳамда илмий ютуқларини намойиш этди.

Анжуман критик минералларнинг дунёдаги тенденциялари, уларни қайта ишлаш технологиялари ҳамда ярим тайёр маҳсулотлардан қўшилган қиймат занжирини яратишда хорижий тажрибани ўрганиш ва лойиҳаларни амалга оширишда лаёқатли инжиниринг компаниялари билан ҳамкорлик ўрнатишга қаратилгани билан аҳамиятли бўлди.

Шунингдек, тадбирда ОКМК бош муҳандисининг технологиялар бўйича ўринбосари Абдуқаҳҳор Сайназаров “Олмалиқ кон-металлургия комбинатида нодир металларни ишлаб чиқаришни кўпайтириш” мавзусида тақдимот ўтказди. Айтиш жоизки, ушбу тадбир тоғ-кон саноати ва геология соҳаси учун муҳим масалаларни қамраб олди. Мулоқот ва тажрибалар алмашинуви учун  ўзига хос майдон бўлди.

ОКМК Ахборот хизмати