Ўзбекистонда “Talpyn Up” тадбиркор аёллари учун менторлик дастури яратилмоқда. Лойиҳа АҚШ Халқаро тараққиёт агентлиги (USAID) томонидан “Imperial College London” коллежи билан ҳамкорликда амалга оширилмоқда. Лойиҳадан кўзланган асосий мақсад аёлларда ишбилармонлик муҳити учун кўникма ва фазилатларни ривожлантириш, бизнес ташаббуслар кўламини кенгайтириш ва нетворкинг эко тизимини яратишдан иборат.

Дастур савдо кўникмалари, солиқ ва молиявий қонунчилик, HR-менежмент, бизнесни режалаштириш, маркетинг ва нетворкинг каби мавзулар бўйича интенсив онлайн таълимнинг олти модулини ўз ичига олади. Курс олти ойга мўлжалланган. Унда 29 ёшгача бўлган хотин-қизлар, кўп болали оналар ёки ривожланишида нуқсони бўлган болаларнинг оналари иштирок этиши мумкин. Бундан ташқари, фаолият юритаётганига 1 йилдан 3 йилгача бўлган бизнес эгалари ҳам қатнашишлари мумкин.

Дастур учта бўлим – индивидуал таълим, ментор маҳорат дарслари ва бизнес тренерлар билан амалий сессиялардан иборат. Курс якунида битирувчиларга дипломлар топширилади.

2023 йилдан бошлаб ушбу менторлик дастури Қозоғистонда амалга оширилиб келинса, жорий йилдан эса у Қирғизистонда иш бошлайди. Қирғизистон ва ўзбекистонлик иштирокчилар учун бу йилда 30 тадан грант ўринлари ажратилса, қозоғистонликлар учун яна 120 та грант ўринлари банд қилинган.

Иштирокчиларни танлаб олиш натижалари 18 апрель куни маълум қилинади. Машғулотлар эса 20 апрелдан бошланиши режалаштирилган.

Роман БОНДАРЧУК тайёрлади, ЎзА