Юртимизда мунтазам равишда сифатсиз, қалбакилаштирилган, Ўзбекистон Республикасида рўйхатдан ўтказилмаган дори воситалари ва тиббий буюмлар, шунингдек, Ўзбекистон Республикасида рўйхатдан ўтказилган дори воситаларининг ғайриқонуний нусхалари айланмасига қарши курашиш мақсадида ҳар ойда бир қатор тезкор тадбирлар ўтказиб келинмоқда.

Жумладан, жорий йилнинг февраль ойида ҳуқуқни муҳофаза қилиш органлари томонидан, Фармацевтика маҳсулотлари хавфсизлиги марказига тезкор тадбирларда олинган фармацевтика маҳсулотларини экспертизадан ўтказиш бўйича 206 та мурожаат келиб тушди. Бу ҳақда Марказ матбуот хизмати маълум қилди.

Тақдим қилинган дори воситалари ва тиббий буюмлар ўрнатилган тартибда лаборатория текширувидан ўтказилганда таҳлиллар натижаларига кўра, ноқонуний муомалада бўлган: 

– 5958 ўрам давлат рўйхатидан ўтган ва мувофиқлик сертификати мавжуд;

– 4505 ўрам давлат рўйхатидан ўтмаган ва мувофиқлик сертификати мавжуд бўлмаган;

– 300 ўрам ёрлиқлаш кўрсаткичи бўйича номувофиқ (контрафакт);

– 726 ўрам яроқлилик муддати тугаган (сифатсиз);

– 1498 ўрам қалбакилаштирилган, умумий 12987 ўрам фармацевтика маҳсулотларининг тиббиёт амалиётида қўллаш мумкин эмаслиги юзасидан хулоса берилди. Ҳамда ушбу сифатсиз, қалбакилаштирилган ва Ўзбекистон Республикасига ноқонуний кириб келган фармацевтика маҳсулотлари айланмасининг олди олинди.

ЎзА