Вазирлар Маҳкамасининг “Ўзбекистон фуқароларини республика ҳудудида ички ишлар органлари таянч пунктлари ҳамда маҳалла ҳуқуқ-тартибот масканларининг профилактика (катта) инспекторлари томонидан вақтинча яшаш жойи бўйича рўйхатга олиш тартибини такомиллаштириш тўғрисида”ги қарори лойиҳаси муҳокамалар порталида кенг жамоатчиликка эьлон қилинди.
Қайд этилишича, бугунги кунда Ўзбекистон фуқароларининг вақтинча турган жойи бўйича рўйхатга олиш таянч пункти ва маҳалла ҳуқуқий тартибот масканлари Миграция ва фуқароликни расмийлаштириш бўлинмалари томонидан амалга оширилаётгани, бўлинмалар туман-шаҳар марказларида фаолият юритаётгани, вилоятнинг олис ва чекка ҳудудларида яшовчи фуқаролар туман-шаҳар марказига келиб-кетишида ортиқча вақт ва маблағ сарфланаётгани фуқароларнинг ҳақли эътирозига сабаб бўлмоқда.
Шунингдек, фуқароларни вақтинча турган жойи бўйича рўйхатга олиш ваколатини профилактика инспекторига бериш ва уни махсус дастур орқали (планшет ёрдамида) амалга ошириш тизимини жорий этишни назарда тутувчи меъёрларни ишлаб чиқиш зарурати мавжуд.
Лойиҳа билан ички ишлар органлари профилактика (катта) инспекторлари томонидан Ўзбекистон фуқароларини вақтинча турган жойи бўйича планшет орқали электрон шаклда рўйхатга олиниши бўйича дастур яратилиши ҳамда фуқароларнинг ортиқча вақт ва сарф-харажат қилишининг олдини олиш мақсадида фуқароларни вақтинча турган жойи бўйича рўйхатга олиш ваколатини профилактика инспекторларига бериш таклиф этилмоқда.
Лойиҳанинг қабул қилиниши билан фуқароларнинг ортиқча харажат қилиши ва сарсон бўлиши олди олинади, маҳалла ҳудудида профилактика инспекторлари томонидан фуқаролар ижтимоий муаммолари жойида бартараф этилишига хизмат қилади.
Ш.Маматуропова, ЎзА