Тошкент метрополитени Ер усти ҳалқа йўлиниг иккинчи босқичи доирасидаги Турон (13-бекат) ва Қипчоқ (14-бекат) бекатларида белгиланган техник синов ишлари олиб борилаётгани хусусида хабар берилган эди.
Мазкур синов жараёнлари муваффақиятли ўз якунига етказилди ва ушбу бекатлар жорий йилнинг 11 март санасидан бошлаб эрталабдан одатий режа асосида йўловчилар учун хизмат кўрсатишни бошлади.
Бундан ташқари, йўловчиларга қулай хизмат кўрсатиш учун метро вагон паркларига 24 та метро вагони олиб келинган бўлса, яна 12 та метро вагони Тошкент шаҳрига кириб келди. Шунингдек, май ойи сўнггига қадар яна 20 та замонавий метро вагони олиб келиниши ҳам режалаштирилган.
“Тошшаҳартрансхизмат” АЖ матбуот хизмати томонидан маълум қилинишича, Тошкент метрополитени Ер усти ҳалқа йўлининг Турон (13-бекат) ва Қипчоқ (14-бекат) бекатлари ишга тушиши муносабати билан ушбу оралиқда вақтинчалик фаолият юритаётган “Тошшаҳартрансхизмат” АЖнинг “12-автобус саройи” филиалига бириктирилган 1м-сонли “Қипчоқ – Қурувчилар метроси” автобус йўналишида хизмат кўрсатиш тўхтатилди.
Маълумот ўрнида таъкидлаш лозимки, ушбу автобус йўналиши 2 та “Кинг Лонг” русумли автобус асосида Турон ва Қурувчилар метро бекатларини ўзаро боғлаш мақсадида ўтган 2023 йилнинг апрель ойида вақтинчалик ҳаракатланиш учун ташкил этилган эди.
Муҳайё Тошқораева,
ЎзА