Қурилиш ва уй-жой коммунал хўжалиги вазирлигида йиғилиш бўлиб ўтди. Унда Тошкент шаҳрида қурилаётган кўп қаватли бино ва иншоотларнинг бугунги ҳолати, мавжуд муаммо ва камчиликларга асосий эътибор қаратилди.
Ўзбекистон Республикаси Вазирлар Маҳкамасининг 2022 йил 20 апрелдаги 200-сонли қарори билан қурилиш соҳасига оид маъмурий Регламентлар тасдиқланган.
Мазкур Регламентларда қурилиш ишларини амалга оширишда жисмоний ва юридик шахслар архитектура-режалаштириш топшириғини ишлаб чиқиш, лойиҳа-смета ҳужжатларини келишиш ҳамда қурилиш-монтаж ишларини бошлаши учун объектни рўйхатдан ўтказишлари шартлиги кўрсатиб ўтилган.
Шунингдек, қурилиш-монтаж ишлари тугалланган объектдан фойдаланиш учун рухсатнома бериш тартиби амалга оширилиши ҳам қатъий белгилаб берилган.
Бироқ айрим ҳолатларда шаҳарсозлик субъектлари, яъни мулкдорларнинг мазкур регламент талабларини бажармаслиги, ўзбошимчалик билан қурилишлар қилаётган ҳолатлари ҳам учраб турибди.
Яқинда Тошкент шаҳар Қурилиш ва уй-жой коммунал хўжалиги соҳасида ҳудудий назорат қилиш инспекцияси пойтахтимизда тегишли қарорларсиз, лойиҳа ҳужжатлари тасдиқланмасдан ёки ундан четга чиққан ҳолда бино устига ноқонуний қўшимча қаватлар қурилаётган турар-жойларни ўрганди.
Тошкент шаҳрида жами 79 та кўп қаватли турар-жой бинолари қурилаётган бўлиб, шундан 41 таси қурилиш-монтаж ишларини бошлаш учун инспекцияни хабардор қилиш орқали белгиланган тартибда рўйхатдан ўтган. 38 та объектда эса рўйхатдан ўтмасдан туриб, қурилиш-монтаж ишлари олиб борилгани аниқланган. Мазкур объект эгаларига нисбатан қонунчиликда белгиланган тартибда маъмурий жавобгарликка тортиш чоралари кўрилган.
Йиғилишда ушбу объектлар юзасидан тегишли ташкилотлар ўз хулосаларини билдиришлари лозимлиги таъкидланди ва шундан келиб чиққан ҳолда аниқ чора-тадбирлар белгилаб олишга келишилди.
Шаҳноза Маматуропова,
ЎзА