Германиянинг Котбус шаҳрида спорт гимнастикаси бўйича жаҳон кубогининг навбатдаги босқичида афсонавий спортчимиз Оксана Чусовитина ўзининг севимли таяниб сакраш баҳсларида финал йўлланмасини қўлга киритди.
«Париж-2024» Олимпия ўйинларида иштирок этиш учун ҳаракат қилаётган ҳамюртимиз эртага, 24 февраль куни ўтадиган баҳсларда иштирок этади.
Тўртта босқичдан иборат жаҳон кубогининг мазкур иккинчи босқич мусобақаларида 300 нафарга яқин гимнастикачилар ғолиблик учун кураш олиб бормоқда.
Бугун, 23 февраль кунги мусобақаларда ҳамюртларимиздан Расулжон Абдураҳимов, Дилдора Орипова, Одина Робижонова, Абдулазиз Мирвалиев ва Ҳумоюн Исломов ўз чиқишларини амалга оширади.
Эслатиб ўтамиз, Миср пойтахти Қоҳирада ўтган жаҳон кубоги илк босқичида терма жамоамиз аъзоси Р.Абдураҳимов брус баҳсларида олтинчи ўриндан жой олган эди.
Т.Рўзиев, ЎзА