Норвегия разведка хизмати вакили Россия Украина билан зиддиятда Эрон, Хитой, Шимолий Корея ва Беларусь томонидан етказиб берилган кўп сонли қўшин ва ёрдам туфайли устунликка эришаётгани ҳақида гапирди.
Таъкидланишича, Киев вазиятни ўзгартириш учун Ғарбнинг кенг кўламли ҳарбий ёрдамига муҳтож.
Киевлик тадқиқотчиларнинг илк таҳлилига кўра, Россия ўтган ҳафта Украина пойтахтини гипер товушли Зиркон ракетаси билан урган, бу қурол илк бор қўлланган. РФ маълумотида Зиркон 1000 км масофани босиб ўта олади, товушдан тўққиз баробар тез ҳаракатланади. Россия бир кечада учирган 17 дрондан 14 таси ва битта “Кх-59” қанотли ракетаси Украина ҳарбий-ҳаво кучлари томонидан йўқ қилинган. Кўплаб бинолар қатори Днепр шаҳрининг марказий қисми вайрон бўлган.
Кремль босиб олинган ҳудудларда Илон Маскнинг “Старлинк” сунъий йўлдошидан ҳарбий алоқада фойдаланилаётгани ҳақидаги даъвони рад этди. Президент матбуот котиби Дмитрий Песков таъкидлашича, тизим на Россияда фойдаланиш учун сертификатланган, на мамлакатга расман етказиб берилган.
Сиёсат ва дипломатия
Украинани қайта тиклаш ишлари бошланиши арафасида Европа Иттифоқи Россия Марказий банкининг музлатилган активидан олинган фойдага тегинмаслик тшғрисида қонун қабул қилди. РФ МБнинг 300 миллиард евро (323 миллиард доллар) миқдоридаги активи музлатиб қўйилган.
Россиялик Кристина Пузирёва АҚШ судида Украинага қарши ҳарбий мақсадда фойдаланиш учун учувчисиз самолёт ва ракета қисмларини Россияга жўнатиш бўйича кўп миллион долларлик келишувда иштирок этганлик учун пул ювишда айбланди, деб хабар берган АҚШ Адлия вазирлиги. Унга 20 йиллик қамоқ жазоси берилиши мумкин.
Россия Буюк Британиянинг 18 нафар расмийлар ва тарихчиларга санкция киритди. Франциянинг онлайн таҳдидга қарши курашувчи “Вигинум” агентлиги Европа ва АҚШда Россия манфаатини тарғиб қиладиган тармоқларни аниқлаган. Шунингдек, Москва суди “Мета” компанияси матбуот котибини терроризмга алоқадор ҳисоблаб судгача икки ой ҳибсда ушлаб туришини эълон қилди. Украина билан зиддиятнинг дастлабки кунларида компаниянинг Фейcбук ва Инстаграм тармоғи Россияда тақиқлаб қўйилган.
Қуролланиш
Украина рақамлаштириш вазири Михаил Федоров “Reuters” ахборот агентлигига Украина 2024 йил Россияга кучли зарба бера оладиган минглаб узоқ масофага учувчисиз самолёт, Москва ва Санкт-Петербургга етиб бориш имконига эга 10 га яқин компания дрон ишлаб чиқараётганини айтди.
Молдова ҳукумати Украина билан чегарага яқин жанубий Этулия шаҳри яқинида Россия томонидан учирилган Шаҳид дронининг бир қисмида топилган 50 килога яқин портловчи модда йўқ қилинганини маълум қилди.
Сардор Поёнов, ЎзА