Бу ҳақда Санитария-эпидемиологик осойишталик ва жамоат саломатлиги қўмитаси ахборот хизмати раҳбари Мафтуна Саидова иштирокида АОКАда бўлиб ўтган брифингда сўз юритилди.
Вирусли гепатит А болалар ўртасида учрайдиган юқумли касаллик бўлиб, жигар тўқималарининг шикастланиши билан кечади. Статистик маълумотларга кўра, республикамизда жорий йилнинг ҳозирига қадар 9507 нафар бола гепатит А касаллигини юқтириб олган.
Касалланиш кўрсаткичларининг ўсиши Андижон, Бухоро, Наманган, Сурхондарё, Самарқанд, Фарғона вилоятлари ҳамда Қорақалпоғистон Республикасида кузатилмоқда.
Гепатит А касаллигига қарши эмлаш 94-98 фоиз ҳолатларда вирус юқишининг олдини олади ва эмлашдан кейин кузатилиши мумкин бўлган жиддий асоратлар кузатилмайди.
Жаҳон соғлиқни сақлаш ташкилотининг тавсиясига кўра, ушбу вакцинанинг хавфсизлиги ва сифатини кафолатловчи сертификатлари мавжуд бўлиб, вакцинация бир маротаба қўлланилади, қайта эмлаш ишлари талаб этилмайди. Вирусли гепатит А касаллигига қарши асосан, 18 ойликдан 14 ёшгача бўлган болалар эмланади. Вирусли гепатит А вакцинаси билан эмланганидан сўнг 15 йилгача муддатда иммунитет таранглиги сақланиб қолади.
Ўтган йилнинг 12 ойи давомида республика бўйича жами 365 167 нафар бола вирусли гепатит А касаллигига қарши вакцина билан эмланган.
Шунингдек, ногирон, кам таъминланган ва ижтимоий ҳимояга муҳтож оилаларнинг 14 ёшгача бўлган болаларини ушбу касалликка қарши эмлаш мақсадида Қашқадарё вилояти, Тошкент вилоятининг Ўрта Чирчиқ тумани ва Тошкент шаҳри ҳокимликлари ташаббуси билан вирусли гепатит А вакцинасини харид қилиш учун маҳаллий бюджетдан жами 4 млрд. сўмдан кўпроқ миқдорда маблағлар ажратилиб, 24 765 нафар бола касалликка қарши эмланган.
– Ҳурматли ота-оналар фарзандларингиз ушбу касалликни юқтириб олмасликлари учун аввало, уларни шахсий гигиена қоидаларига риоя қилишга ўргатинг ва уларни гепатит А га қарши ўз вақтида эмлатинг. Ҳар бир ота-она фарзандининг саломатлиги учун масъул эканлигини унутманг, – деди М.Саидова.
Моҳигул Қосимова, ЎзА