Тадбиркорлик субъектларининг барқарорлик рейтинги мазмун-моҳиятини тушунтириш мақсадида қурилиш соҳасида фаолият юритувчи тадбиркорлар иштирокида семинар ўтказилди.

Унда Солиқ қўмитаси раиси Ш.Кудбиев, Савдо-саноат палатаси раиси Д.Ваҳобов, Бизнес-омбудсман Д.Қосимов, Қурилиш ва уй-жой коммунал хўжалиги вазирининг ўринбосари Д.Адилов, “Ўзсаноатқурилишматериаллари” уюшмаси, Президент ҳузуридаги Тадбиркорликни қўллаб-қувватлаш бўйича жамоатчилик кенгаши аъзолари ва бошқа мутасадди ташкилотлар вакиллари иштирок этди.

Президентимизнинг жорий йил 23 январдаги “Тадбиркорлик субъектларининг барқарорлик рейтингини жорий этиш чора-тадбирлари тўғрисида”ги қарори билан солиқларни ўз вақтида тўлаб, қонунчилик талабларига амал қилган ҳолда фаолият юритаётган тадбиркорлик субъектларига янада қулай шарт-шароитлар яратиш ва уларни рағбатлантириш мақсадида “Тадбиркорлик субъектларининг барқарорлик рейтингини” жорий этиш белгиланган.

– Мамлакатимизда қурилиш саноатида фаолият юритаётган тадбиркорлик субъектлари 34,5 мингтани ташкил этиб, ушбу корхоналарда 417 мингдан ортиқ аҳоли бандлиги таъминланган, – дейди Д.Ваҳобов – Биргина 2023 йилнинг ўзида қурилиш корхоналари томонидан жами 150 трлн. сўмга яқин қурилиш ишлари амалга оширилган. Қувонарли жиҳати, қурилиш соҳасида бажарилган ишларнинг 70,4 фоизи айнан иқтисодиётда янги ишлаб чиқариш қувватлари, турар-жой ва бошқа ижтимоий объектларга тўғри келмоқда.

Учрашувда таъкидланганидек, қурилиш саноатидаги 34,5 мингта корхонанинг 24,1 мингтаси қурилиш, 10,4 мингтаси қурилиш материаллари ишлаб чиқарувчи корхоналарга тўғри келади.

Таҳлил қилинганда 10 947 та корхонага 1 нафар ишчи, 4 219 та корхонага 2 нафардан ишчи, 5 585 та корхонага 4-10 нафар ишчи ходим тўғри келаётгани маълум бўлди.

Тадбиркорлик рейтинги солиқ хизмати органлари ёндашувини ўзгартиряпти.

Тадбиркорларнинг барқарорлик рейтинги фақат рағбатлантиришга асосланган. Тадбирда барқарорлик рейтинги бўйича тадбиркорларга бериладиган имтиёз ва преференцияларни ўз вақтида қўлланилиши устидан олиб бориладиган назорат, тадбиркорлик субъектларининг барқарорлик рейтингини аниқлашда автоматлаштирилган платформа, шунингдек, мамлакатимизда қурилиш соҳасида амалга оширилаётган ишлар, тадбиркорларнинг давлат томонидан қўллаб-қувватланиши натижадорлиги ва ечимини кутаётган масалалар хусусида сўз юритилди. Вазирлар Маҳкамасининг 2024 йил 30 январдаги қарори билан тасдиқланган барқарорлик рейтинги мезонлари мазмун-моҳияти хусусида маълумот берилди.

Давлатимиз раҳбарининг юқоридаги қарорига мувофиқ, Ўзбекистонда 2024 йил 1 февралдан тадбиркорлар рейтинги жорий этилиб, юқори рейтингга эга тадбиркорлар рағбатлантирилади. Бунда рейтинги паст корхоналарга нисбатан жазо чоралари қўллаш назарда тутилмаган.

Семинарда қайд этилишича, агар тадбиркор “ААА” тоифадаги рейтингга эга бўлса, солиқ органлари томонидан текширишлар ўтказилмайди. ҚҚСдан ҳосил бўлган солиқ суммаси бир кунда қайтарилади (амалдаги муддат 7 кундан 30 кунгача). ҚҚСдан бошқа солиқ турлари бўйича ҳосил бўлган ортиқча солиқлар суммаларини уч кунда қайтариб бериш (амалда 10 кундан 15 кунгача) юзасидан қўшимча преференциялар берилади.

Шаҳноза Маматуропова, ЎзА