Мамлакатимизда фармацевтика фаолияти билан шуғулланувчи жами 204 корхона фаолият юритмоқда. Доривор ўсимликлар ва биологик фаол қўшимчалар ишлаб чиқарувчи 276 корхона мавжуд.

Фармацевтика (дори воситалари, тиббий буюмлар ва тиббий техника ишлаб чиқарувчи) корхоналари томонидан 3 минг 922 турдаги маҳсулотлар тайёрланади. Хусусан, 3 минг 290 турдаги дори воситалари, 468 турдаги тиббий буюмлар, 84 турдаги тиббий техникалар ҳамда 80 турдаги субстанциялар ишлаб чиқарилмоқда.

Бу Сенатнинг Фан, таълим ва соғлиқни сақлаш масалалари қўмитаси мажлисида қайд этилди. Фармацевтика тармоғини ривожлантиришга оид вазифалар ижроси бўйича амалга оширилаётган ишлар ҳолати юзасидан Фармацевтика тармоғини ривожлантириш агентлиги директорининг ахборотини эшитиш асносида фаолият юритувчи жами 82 та корхонадан 40 тасида GMP талаблари, 500 дан ортиқ улгуржи ташкилотларнинг 151 тасида GDP талаблари жорий этилгани таъкидланди.

Шунингдек, битта лабораторияда GLP талаби, битта сақлаш омборхонасига GSP ҳамда битта дорихонада GPP талаби жорий этилган.

Тошкент вилояти Зангиота туманидаги туташ ҳудуддан қўшимча 80 гектар ер майдонини ажратиш ҳисобига “Tashkent Pharma Park” фармацевтика кластерининг саноат ҳудуди кенгайтирилди.

Бугунги кунда фармацевтика саноати бўйича 5 та (“Бўстонлиқ фарм”, «Паркент-фарм”, «Андижон-фарм”, «Косонсой-фарм” ва «Зомин-фарм”) эркин иқтисодий зонаси фаолият юритмоқда.

Муҳокамалар жараёнида фармацевтика соҳасида янги ишлаб чиқарувчи корхоналар, улгуржи ва чакана савдо ташкилотлари мос равишда “Зарур ишлаб чиқариш амалиёти (GMP)”, “Зарур дистрибюторлик амалиёти (GDP)” ва “Зарур фармацевтика (дорихона) амалиёти (GPP)” талабларига мувофиқ равишда ташкил этилмаганига эътибор қаратилди.

Мажлисда дори воситалари хавфсизлиги ва сифатини таъминлаш мақсадида дори воситаларини улгуржи (GDP) ва чакана (GPP) реализация қилувчи ташкилотларга зарур амалиёт стандартларини жорий этиш ишларини тизимли йўлга қўйиш, дорихоналар фаолиятини халқаро талаблар асосида ташкил этиш зарурлиги қайд этилди.

Президентимизнинг фармони билан тасдиқланган 2022-2026 йилларда фармацевтика тармоғини янада ривожлантириш бўйича “йўл харитаси”да белгиланган айрим вазифалар тўлиқ бажарилмагани сенаторлар томонидан танқид остига олинди.

Тўлиқ бажарилмаган вазифаларни қисқа муддатда бажариш бўйича масъул вазирлик ва идоралар вакилларининг таклифлари асосида чора-тадбирлар белгилашга келишиб олинди. Бундан ташқари, асосий дори воситалари рўйхатини дорилар рўйхати, тасдиқланган клиник баённомалар, тавсиялар ва даволаш стандартларидаги тақдим этилган дори воситалари рўйхати билан мувофиқлаштириш юзасидан амалий таклифлар берилди.

Даволаш-профилактика муассасалари, дорихоналар ҳамда дори воситаларини ишлаб чиқарувчи, реализация қилувчи ва қўлловчи ташкилотлар томонидан дори воситаларининг қўлланилиши чоғида ножўя таъсир (реакция)лар аниқланган барча ҳолатлар тўғрисида Соғлиқни сақлаш вазирлигини хабардор қилиш амалиётини йўлга қўйиш зарурлиги таъкидланди.

Мажлисда Соғлиқни сақлаш вазирлиги масъуллари ҳамда “Фармацевтика маҳсулотлари хавфсизлиги маркази” давлат муассасаси раҳбарларининг дори воситалари ва тиббий буюмларнинг хавфсизлиги ва сифатини таъминлаш соҳасидаги ахборотлари ҳам тингланди.

Н.Абдураимова, ЎзА