Президент қарори амалда

Мамлакатимизда бизнесни қўллаб-қувватлашнинг янги механизмлари жорий қилиниб, ушбу соҳани ривожлантириш борасида давлат раҳбари бошчилигида туб ислоҳотлар амалга оширилмоқда. Натижада бугун ҳар бир ишбилармон доира вакиллари ислоҳотлар натижасини ўзининг фаолиятида ҳис қилмоқда.

Ушбу ислоҳотларнинг яна бир исботи – 2024 йил 23 январь куни Ўзбекистон Республикаси Президенти Шавкат Мирзиёев томонидан имзоланган “Тадбиркорлик субъектларининг барқарорлик рейтингини жорий этиш чора-тадбирлари тўғрисида”ги қарор бўлди.

Айни пайтда пойтахтимизда мазкур қарор бўйича эртадан жорий этилаётган Тадбиркорлик субъектларининг барқарорлик рейтинги мазмун-моҳиятини кенг тушунтириш юзасидан семинар-тренинг бўлиб ўтмоқда.

Савдо-саноат палатаси раиси Д.Ваҳобов, Солиқ қўмитаси раиси Ш.Кудбиев ва Президент ҳузуридаги Тадбиркорлар ҳуқуқ ва манфаатларини ҳимоя қилиш бўйича вакил Д.Қосимов иштирок этаётган тадбирда тарихий аҳамиятга эга бўлган навбатдаги ҳужжат бизнесни қўллаб-қувватлашнинг янги механизми бўлиши таъкидланди.

Ушбу қарор билан, эндиликда тадбиркорлик фаолиятига, унинг барқарор ишлашига, хусусан, қонуний фаолият юритиб, янги иш ўринларини яратиш, инвестициялар жалб қилиш, маҳаллий маҳсулотларнинг экспортини амалга ошириб, жаҳон бозорларига чиқаётган тадбиркорлар учун субсидия, имтиёз ва преференциялар тақдим қилинади.

Энди тадбиркорлик субъектларининг фаолиятига автоматлаштирилган ахборот тизими баҳо беради. Мулоқот давомида рейтинг натижаларига кўра тадбиркорларимизга имтиёз, субсидия ва преференсиялар берилиши белгилаб қўйилгани қайд этилди.

Барқарорлик рейтинги келажакда мамлакатимиз тадбиркорларининг юзи бўлиши, у чет эл бизнеси орасида тан олиниши, чет эл корхоналари ўзбек тадбиркорлари билан хамкорлик қилишидан олдин рейтинга қараб баҳо бериш имкони яратилади.

Тадбирда, шунингдек, қарорда акс муҳим вазифалар юзасидан фикрлар билдирилмоқда.

Беҳруз ХУДОЙБЕРДИЕВ,

ЎзА