Тошкент шаҳар ҳокими в.б. Ш.Умурзоқов бошчилигидаги делегация Хитойнинг Шенчжен шаҳридаги “Shenzhen Bus Group” корхонасига ҳамда “BYD”компаниясига ташриф буюрди.
Ташриф давомида корхонанинг тарихи ва фаолияти ҳақида атрофлича маълумот берилди, шунингдек, шаҳар жамоат транспорти ва такси тизимини бошқариш учун мўлжалланган Вазиятлар маркази фаолияти билан яқиндан танишилди.
Хусусан, электробуслар ҳаракатини назорат қилиш, йўловчилар оқимига қараб ҳаракат йўналишларини бошқариш, автобусларни зарядлаш ва ҳоказолар ҳақида маълумот берилди.
Ташриф доирасида, “BYD” компанияси президенти Ванг Чуангфу билан учрашув ташкил этилди.
Ш.Умурзоқов компаниянинг фаолияти ва жамоат транспортини бошқариш бўйича улкан тажрибасини ўрганиш муҳимлигини ва Тошкент шаҳрида жамоат транспортини ривожлантириш билан бирга, мазкур соҳада ишловчи мутахассислар малакасини ошириш муҳимлигини ҳам таъкидлаб ўтди.
Учрашув давомида компания Президенти “BYD” компаниясининг фаолиятини кенгайтириш, Ўзбекистон автомобилсозлик бозорига кириш йўлида мамлакатимиз раҳбарияти томонидан билдирилган ишонч ва ҳамкорлик учун ўз миннатдорлигини билдирди. Мамлакатимизнинг икки ҳудудида заводлар қуриш бўйича ишлар жадал кетаётганлигини ҳамда ўзаро манфаатли ҳамкорликни янада кенгайтиришдан манфаатдор эканлигини айтиб ўтди.
Икки томонлама ҳамкорлик доирасида қилинадиган ишларни аниқ белгилаб олиш ва яқиндан ҳамкорлик қилиш мақсадида Ишчи гуруҳ тузиш ва “Қўшма дастур” ишлаб чиқиш, шунингдек, коммунал соҳани замонавий техникалар билан таъминлаш юзасидан ҳам ҳамкорлик қилиш истагини билдирди.
Гулноза Бобоева, ЎзА