Германия канцлери яқин орада Германия ва Украина ўртасида хавфсизлик бўйича келишув тузилиши мумкинлигини айтди.
“Dautche Welle” ёзишича, Олаф Шольц Украина Президенти Владимир Зеленский билан телефон орқали суҳбатлашган. Улар хавфсизлик бўйича ҳамкорлик келишувини имзолаш масаласини муҳокама қилган. Бу ҳақда Шольц кеча Берлинда Словакия Бош вазири Роберт Фицо билан бирга уюштирилган қўшма матбуот анжуманида маълум қилди.
Унинг сўзларига кўра, ҳозир яқин келажакда тузилиши мумкин бўлган мазкур келишув тайёрланмоқда. Масала қайси сана ёки муддатда муҳокама қилинишига аниқлик киритилмаган. Бинобарин, “музокарал якуний босқичга етиб қолган”, деди Шольц.
Ўз навбатида Владимир Зеленский ҳам ижтимоий тармоқ орқали “Украина ва Германия ўртасида хавфсизлик кафолати бўйича келишув тайёрлаш масаласи алоҳида муҳокама қилигганини” айтган. Президент, шунингдек, Украинага жорий йилги мудофаа ёрдами 8 миллиард еврога оширилгани учун Олаф Шольцга миннатдорлик билдирган.
Кўриб чиқилаётган келишув Украинага Россия билан уруш тугагандан кейинги хавфсизлик бўйича кафолат беради, дея мавзга аниқлик киритди “Reuters”. Агентлик маълумотига кўра, Берлиндаги ҳукумат доиралари ушбу режа февраль ойида аниқ амалга ошишини таъкидламоқда. Аввалроқ, яъни 12 январь куни Киев ва Лондон хавфсизлик кафолати бўйича келишув имзолагани маълум бўлган эди. Буюк Британия янги ҳужум содир бўлган тақдирда Украинага тез ва доимий кўмак беришни назарда тутувчи шартнома имзолаган биринчи давлат бўлди. Битим Украина НАТОга киргунга қадар кучда қолади.
Франция ҳам Украина билан хавфсизлик шартномаси тузишга ваъда берган. Зеро, Вильнюсда бўлиб ўтган “Катта еттилик” саммитида Украинага хавфсизлик бўйича узоқ муддатли мажбуриятлар ваъда қилинган. Бу битимлар ўша ваъданинг бажарилиши, дейиш мумкин.
К.Бекжонов, ЎзА